是咁的,聽日有個「2017本土要得大遊行」,遊行主旨大概係要展示本土派反對政改/繼續抗爭嘅聲勢之類,遊行路線係遮打花園出發,沿電車路過金鐘,經軍器廠街調頭,再行夏愨道喺海富過天橋向海邊行,以立法會為終點。呢幾日都有聽到有人話去或唔去,而筆者我就咁睇嘅:

唔係一個perfect池嘅戰場
筆者我個人認為,聽日個遊行唔係一個perfect池嘅戰場,設定上有啲地方麻麻地。首先,遊行個名義唔夠吸引,對殖民主派仍然有少少期待嘅村民見到係本土派未必想join,比較前衛嘅本土派中人亦唔會支持,同埋個名唔多老禮,本土最好梗係盡快得啦,2017可能遲咗啲。好衰唔衰,日期又死,第二日係支聯會遊行,親飯民村民可能都會去遊行悼念六四,本土派亦會想去狙擊飯民政棍,如果將「530遊行」變成「531狙擊」可能更好。路線上,沿路亦無乜空間俾義士「勇武」,金鐘、警總、政總、立會,通通都係(以遊行人數計)衝嚟都嘥氣嘅地方。以勇武嚟計,呢個戰場唔理想係擺到明架啦。

之但係,筆者又唔認為呢個遊行係絕對去唔過嘅。睇牌面,發起今次活動嘅本土派組織,比較多人識嗰兩個應該係香港本土力量同埋中大本土學社,有戰功,有經驗,都算有「作戰經驗」同判斷力,上周六黃大仙一役,堂堂嫻姐都收晒皮,「突然」轉往大成小學雖然引來一個小妹妹「大聲啲」問「犯咗法又點喎」,但陣勢仍在(梁振英之流盲目指責只會變成曲線支持本土派)。

巧婦難為無米之炊
打仗嘅嘢,學先前另一位作者嘅文所講,「以正合,以奇勝」,筆者相信,聽日有可能會有意料不到嘅事發生,呢個就要留待聽日先知啦。筆者想講嘅係,除咗「雙學」、「三恥」,邊有人「行動升級」會大大隻字刻喺額頭到話你知?!如果聽日有人有計劃堅做,亦需要有足夠群眾掩護先成到事。呂布再威猛,無咗一啲將領同隻赤兔馬都會被擒啦。就算聽日可能有人想行動,都唔係自己幾丁友就行動到架嘛?一旦聽日有一定人數,但原來只係鳩行無聲勢無行動,本土派所有人都會記住各個舉辦組織嘅旗號,就好似「熱狗」光復不力、「本民前」無啦啦執垃圾一樣,要面對本土派批評。Last but not least,筆者希望各位義士就算唔諗住出席呢次遊行,亦要買定花生,睇下係咪會變成「誠實本土」,無乜料到。