睇完一篇講人才荒嘅報道真係火都嚟

IT人才荒:課程已過時 削港競爭力
http://www.on.cc/hk/bkn/cnt/news/20150515/bkn-20150515213117821-0515_00822_001.html

辣着我嘅主要係以下精華片段:

//盡快優化引入專才政策,並考慮以深圳作本港的人才庫//

//他舉例,當年科網熱潮興起,IT人為了加人工,「跳嚟跳去」,故即使求職者聲稱有5至7年經驗,在他而言,「未必叫有經驗」//

//本港青年「又Hea又懶」,寧願聘請「夠搏」的內地人才//

//「深圳同香港關係密切,亦都係人才庫,政府可以考慮參考澳門政策。」//

篇野係咁強調要係深圳輸入人才,又一面踩底香港年青人,一面就抬到大陸人上天,我覺得依個係對香港年青一輩 IT 人嘅極大羞辱。點解咁講?

話說本人從事 IT 業10數年,同香港人一齊做過野,又同大陸人一齊做過野,最初幾年做嘅公司係全香港人班底,人就係咁衰,無比較之下真係身在福中不知福,以為做野應該就係咁架喇。

點知到我轉到去一間全部 programmer 都係大陸人嘅公司果陣,我就知道當我有嘅時候唔識欣賞係幾咁on9。

當我啱啱入職果陣,我真係有種天堂跌落地獄嘅感覺,同啲大陸人講野呢,有啲人係可以講極都唔明你想做乜,有啲就乜都話明,做出嚟就錯晒,啲野求其做完就算,對質素可以話係無要求,仲要係交貨慢果隻,我睇完啲野之後要彈返轉頭好多次,最後都唯有包容收貨,到交貨俾人果陣咪要自己受靶俾人鬧囉。

仲大鑊嘅係班友做完啲野係唔會自己check 返,留返一大堆地雷係度,對住佢地交出啲咁嘅貨,要係咁執已經夠嘥時間,最慘仲要加埋佢地埋落啲地雷出到街之後爆鑊真係想死,要救火已經頭都痕,仲要俾啲老細插到出血,阿老細,點解爆鑊呀?爆鑊當然我都有責任,但係你無責任咩?你貪平咪攪到咁囉。

有時仲頂癮,搵人做野果陣啲友仔可以唔見人幾粒鐘都夠膽死。見識到大陸人做野之後我咪知咩叫對自己有要求,咩叫效率,咩叫責任心,咩叫交帶,咩叫質素囉。當然我唔係話香港人叻到識飛,不過係大陸人嘅質素…….咩囉。

我敢講,圍埋條數包括交貨速度+救火時間等等因素,請一個香港人可以頂到三個大陸人。我睇到如果輸入大陸專才到時就真係“慌“喇。// 「夠搏」的內地人才//….. 完全唔覺囉。

而我最擔心嘅仲係如果政府係都要輸入大陸 IT 人才,到時就大把老細會貪平請佢地而唔用香港人,咁香港 IT 業就會好似香港電影業咁無機會俾新人, train up 唔到啲新人就真係青黃不接。順帶爆少少野,香港啲老細因為貪平已經惹落唔少禍,眼見幾個著名大機構(唔開名)外判啲大 project 俾印度人做,結果係爛晒返嚟要從頭做過,真係嘥金嘥時間,你話啲老細係咪會受到教訓?hahaha

有樣野想澄清同發洩下,有啲關於香港後科網黑暗年代,無興趣者可以略過。文中提到一個例子我認為極之誤導:
//他舉例,當年科網熱潮興起,IT人為了加人工,「跳嚟跳去」,故即使求職者聲稱有5至7年經驗,在他而言,「未必叫有經驗」//
講到香港嘅 IT 人成日跳槽咁,當年科網熱就有依啲機會啫,10幾年前嘅事喇,之後仲邊有咁好景俾你周圍跳呀?仲有其實係科網爆之後一兩年,香港好多 IT 人都係跳嚟跳去?點解?因為科網爆加埋911後經濟倒退,唔只cap 水嘅空穀科網公司,就算好多有實質業務做 project 嘅 IT 公司都頂唔住要 cut 人甚至摺埋,包括本人做嘅公司。大佬,唔搵過份工真係想攞綜緩咩,不過啲離地老細就會話點解你咁 jumpy 囉,你又唔睇下當時有幾多人失業?死唔到你就講埋啲風涼話,你班友係咪想話搵野做都有罪呀?後科網黑暗年代實在一匹布咁長,講到依度算。