每年到左畢業生準備搵工之際就總會有報導話九十後有幾唔挨得,又要高人工又唔肯OT。對老闆黎講有個人工有咁低得咁低工時有咁長得咁長既員工先係最好,但一個做野做到呆哂嘅人工作效率又有幾高?員工雖然係收糧幫老闆做野,但員工都係一個人,都有佢自己嘅生活,員工嘅一生唔應該只係做野。我唔否認九十後好多人唔識禮貌做野又差,但咁都唔應該將所有九十後定性為任性嘅一群。唔做奴隸就要比人話,公平咩?

香港消費高,為左養活自己同屋企人好多人都會好著緊自己份工。就算個老闆成日臨收工先比幾份野你話急用幫佢做埋先、就算返到屋企都仲要Keep住Check  Email、就算有幾多唔合理嘅要求都好,香港人都可以毫無怨言咁做落去。社會鍾意讚依班人肯挨唔怕蝕底,有獅子山精神,其實只係一班商人暗笑緊有一大班廉價勞工可以用。一班上左年紀嘅五六七十後不論係打工定係老闆都覺得做到隻狗咁係冇問題,因為佢地以前嘅社會係多勞多得。就算到左而家個社會已經變哂都好,佢地都拎住舊果套黎辦事同埋作為批評「而家啲後生」嘅準則。其實而家九十後只係要求Work Life Balance,工作同時也要有自己個人嘅生活,依點本應係正常不過,畢竟返工唔係真係賣命,點解打工嘅要同你將生命都燃燒哂係份工身上?

返工時間其實訂左係咁多就咁多,真係有急事耐唔耐幫老闆OT一陣其實唔係大問題,但而家班HR同老闆就當左肯OT係基本野。但我相信係老闆唔係比唔成正比嘅工作量嘅情況之下,OT只係一件無謂既事。一個正常能力嘅人理應可以喺工作時間內搞掂哂啲工作,如果佢日日都要OT,我相信佢既工作能力係有問題。如果打工仔要OT係因為工作需要,例如個客係外國人經常喺五六點先會覆你趕住要嘅野,或者日日都要對住大量嘅文件根本冇可能準時走,咁好明顯就係老闆嘅問題。一係你就直接喺合約寫明工作需要係放六七點,唔好簽完約先話其實OT係一件好正常嘅事,再唔係你就加高個人工。就算你出去食個公仔麵想要加料都要比錢啦係咪?

喺香港無能嘅九十後一定有,但我覺得過份嘅老野更多。你果套以前嘅年代可以唔代表而家仲得,後生唔跟你果套做法唔一定係反叛,只係唔同年代嘅人思考上會有分別。喺話九十後出黎做野唔識人情世故之前,班老闆又會唔會意識到時代已經唔同左?點解人地Google個工作環境咁多休閒設施去畀員工「偷賴」都好佢地都可以有咁高嘅工作效率?對於班仲係以為死做爛做就係好既五六七十後黎講,佢地永遠都唔會明白。