警告:內文有血腥驚慄圖片

 

如果要我推薦一齣已經上咗神枱成為後世典範嘅cult片,我第一時間會諗起《Night of the Living Dead 活死人之夜》

《活死人之夜》(Night of the Living Dead)

哩齣電影原本只係一齣低成本嘅低俗恐怖片,相信連導演George A. Romero 都冇諗過該片會成為恐怖電影史嘅轉折點,亦為現代喪屍片揭開序幕!

《Night of the Living Dead》劇情係述Johnny同Barbra兩兄妹為完成母親嘅要求,千里迢迢揸車到鄉下只為到父親墳前掛上花環, 因為Barbra嘅細膽令johnny忍唔住攞「死人復活」嘅玩笑嚟戲弄佢,估唔到玩笑居然成真,不明原因令成千上萬嘅死人都變成「活死人」,並開始瘋狂追逐活人,一步一步趕盡殺絕,造成全美國的恐慌………

1561695

嗱,如果淨係表面劇情睇落就好似平平無奇,但當時導演George A. Romero拍攝該片嘅時候,只係一個初出茅廬嘅電影新秀,因為無錢拍攝血腥的場面,George A. Romero就運用咗黑白影片拍攝,哩一種方法技巧反而令電影透露出一種前所未有嘅末世氛圍。

又以現今化妝技術嚟論該片嘅話,其實George A. Romero只係簡單將人臉化妝成慘白色,同近十年喪屍片果種殘肢斷截嘅身體,或者個頭唔見一半腦漿四溢果種寫實化妝相比,真係小巫見大巫!!

但就因為化妝技術同資金有限(只有11萬美元),George A. Romero一位從事豬肉商嘅朋友友情贊助好多唔要錢嘅豬內臟,造就出電影中喪屍食人場面更加逼真。

1569670

原本只係草率拍攝嘅低俗恐怖片,竟然因為George A. Romero刻意凸顯嘅意念,從而成為現代喪屍片開山祖師。流暢嘅鏡頭語言、詭譎又恰如其分嘅電影配樂塑造出整部影片嘅恐怖氛圍;編劇好巧妙呈現出不同個性人物喺面對生命威脅時不同反應,人類本性中自私、懦弱、猜忌、懷疑都可以喺片中一攬無遺。全片高潮叠起,情節緊湊,出人意料嘅結局為影片增色不少!

除咗上述要素外,最令該片上神枱嘅原因就係 《Night of the Living Dead》 有幾點對後世影響深遠嘅喪屍片基本法則,成為日後所有喪屍片必備場景:

  1. 原因不明因素令屍體起死回生。喪屍本身冇任何意識力與思考能力,完全是靠本能在活動的
  2.  喪屍喜歡嗜食人肉。為找尋活生生嘅人肉而襲擊人類,係喪屍唯一本能。
  3. 喪屍會感染。被喪屍咬到嘅人,死後會變成喪屍。
  4.  喪屍基本上唔會死亡。因為佢早已經係死咗,所以無論如何點去傷害佢肉體,喪屍依然會繼續活動。如果要令喪屍停止活動,只有將佢個頭打爆,或者點火將他燃燒。
  5. 聯群結隊舉起雙手用唔穩定腳步慢慢邁進嘅喪屍集團,將人類趕到密閉空間所產生嘅恐慌同埋內心嘅糾纏。

喪屍片簡史

OLYMPUS DIGITAL CAMERA

OLYMPUS DIGITAL CAMERA

《White Zombie》: 1932,史上首部以喪屍為題材的電影。但可惜當年吸血殭屍片大興其道,最諷刺嘅無連本片嘅男主角係專演吸血殭屍嘅Bela Lugosi,跟本無人會喜歡呆頭呆腦嘅喪屍。其實當時喪屍片作為一種類型片嚟講,並未算真正成型,直到 George A. Romero 帶來了《活死人》系列 喪屍先真正發揚光大。

《活死人之夜》(Night of the Living Dead)

《活死人之夜》(Night of the Living Dead): 1968年,導演Romero只用11萬美元嘅低製作成作,兼任編、導、攝影及剪接四職,以《活死人之夜》(Night of the Living Dead)將喪屍片種正式成型,而且更被視為「現代恐怖片」始祖,展開咗長達45年「喪屍3部曲」。
從此,從此喪屍就成為導演們鍾愛,亦都受到全世界Cult迷嘅追捧。

《生人勿近》(Dawn of the Dead)

《生人勿近》(Dawn of the Dead): 1978,Romero喪屍三部曲第二部,系列評價最高之作,對人性與人性之衝突與社會意識主義進行咗深刻探討。

Zombie

《Zombie》: 1979,意大利導演Lucio Fulci代表作,作為喪屍界唯一可以同Romero匹敵的大宗師,而且用作品殘酷程度作標準前者要比後者更勝一籌。

《Thriller》

《Thriller》: 1982,Micheal Jackson的MV短片,「史上最佳MV」第二名,片中那段喪屍舞成為經典中經典。連king of pop都要叨喪屍嘅光,可見當年喪屍片有幾紅。

《鬼玩人》(Evil Dead)

《鬼玩人》(Evil Dead): 1983,《蜘蛛俠》(Spiderman)導演Sam Raimi成名作,系列共有三部,其第二部被影迷們奉為「史上最受歡迎恐怖片」。

《嘩鬼翻生》(The Return Of The Living Dead)

《嘩鬼翻生》(The Return Of The Living Dead):
1985,開創咗搞笑喪屍片先河。

《喪屍出籠》(Day of the Dead)

《喪屍出籠》(Day of the Dead): 1985,由夜晚殺到黎明,再由黎明殺到大白天,Romero喪屍三部曲終於告一段落了。其實比起前兩部該片評價一般,但論噁心血腥程度係系列之冠,而且終於解釋咗喪屍係咩嘢嘅“科學解釋”,於是亦成為Cult迷必看經典。

《群屍玩過界》(Dead Alive)

《群屍玩過界》(Dead Alive): 1992,Peter Jackson早於《魔戒 三部曲 》之前就憑藉此片馳名Cult界,該片被譽為“史上最血腥噁心之電影”,亦都係90年代最爽快黑色幽默電影。同時做到最血腥噁心同最黑色幽默,睇怕只有Peter Jackson先有哩個本事。

《生化危機》(Resident Evil)

《生化危機》(Resident Evil): 2002,喪屍電影啟發出喪屍電子遊戲,到頭來又變返電影相信係製作人意料之外。

《28日後》(28 Days Later)

《28日後》(28 Days Later): 2002,奧斯卡得獎導演Danny Boyle每部作品總係醉心於用唔同角度揭示社會黑暗面,喺《迷幻烈車》(Trainspotting)被年青觀眾奉為神作之後,哩部《28日後》再次成為電影史上經典。該片對人性深刻揭露,以及顛覆咗喪屍一定係行動緩慢嘅傳統觀念,將喪屍片帶進了另一新紀元。

《活死人凶間》(Dawn Of The Dead)

《活死人凶間》(Dawn Of The Dead): 2004,《喪屍出籠》重拍版,保留咗《活死人》系列精髓同時,更注入了新時代嘅拍攝手法令導演扎Zack Snyder一鳴驚人。

《笑死人凶間》(Shaun of the Dead)

《笑死人凶間》(Shaun of the Dead): 2004,攞《活死人》系列嘅片名嚟惡搞就知道哩一部係搞笑喪屍片,但搞笑到如此出色,實在出人意料。

該片以英式幽默戲謔傳統喪屍電影,兩者融合竟然產奇妙效果,成為當年話題之作,連Romero本人都對此片頗為讚賞,邀請了主角Simon Pegg參演他的新作《活死人地帶》。

《活死人地帶》(Land of the Dead)

《活死人地帶》(Land of the Dead): 2005,Romero重振《活死人》系列嘅野心之作,同時亦係集系列大成之作。

《Zombieland》

《Zombieland》:2009,繼Shaun of The Dead之後,又一部笑料百出而又不失應有血腥暴力嘅喪屍片。濃密黏稠嘅血漿,美豔嘅半裸喪屍,無處不在嘅黑色笑料同埋逃避喪屍嘅法則,綜合以上條件註定Zombieland會成為Cult迷恩物。

《Miss Zombie》

《Miss Zombie》:2013,由日本人所拍嘅喪屍片, 講述一個家庭收養咗隻女喪屍後,將佢當奴隸使喚。喪屍每日就只有像女僕般不停清潔地板,甚至被人類強姦任人淩辱。到底係喪屍恐怖定人類恐怖?

《Warm Bodies》

《Warm Bodies》 :2013,又一次將想將傳統喪屍片顛覆,影片講述人類與喪屍嘅愛情故事,但原著小說比電影吸引。


筆者有陣時會希望終有一日喪屍世界會真係出現響哩個將自由逐漸打壓收窄嘅社會 ,令每個人都變成喪屍,咁樣就唔洗煩惱於現實中各種剝削、攏斷、操控、不公平嘅人性嘅爭鬥。

但再諗深一層身邊大多數人每日都過住營營役役,人云亦云嘅生活方式,其實佢地同無靈魂嘅喪屍又有咩分別? 喪屍世界原來早已經出現咗你我之中。