點解?明明兩套都有劉松仁做,但班網民話寧願將《大時代》搬去九點半播,都唔睇華麗轉身?點解報紙娛樂版不停回帶討論套陳年劇嘅情節,都唔幫呢套新劇做宣傳?

真係純粹因為《大時代》好睇啲?

卡士問題?《大時代》有秋官+松哥+影帝劉青雲(個陣未係影帝)+周慧敏+藍潔瑛+一堆老戲骨,冇錯係好勁,但今日嘅CCTVB要搵返同樣陣容其實又唔係話好難,秋官松哥仲係藝員,搵影帝返嚟拍劇唔係Mission Impossible(張家輝仲有劇債、吳鎮宇剛剛先拍完衝上雲霄2,甚至劉德華都話過可以返嚟拍劇),靚女未必可以搵返藍潔瑛LEVEL但CCTVB從來不缺,至於老戲骨TVB而家仲多過以前,直頭由老戲骨擔正做主角。

劇本問題?可能係,唔係話CCTVB冇下一個韋家輝,而係下一個韋家輝係CCTVB入面都冇可能發揮到,高層唔會再比你寫到第一集就掉仔落街;高層亦唔係比你寫到主角一家死剩一個,更唔會比你寫出丁蟹呢種痴線角色怕教壞細路。

特技更加唔洗講,今日肯定進步過以前啦,第一集掉仔落街個時大家會好明顯見到條威也,而家至少有能力抹走佢。

資金?其實TVB仲有錢過以前,只係TVB肯唔肯洗而已。

其實呢啲都係次要,時代變咗先係主因。TVB絕對有能力拍多次《大時代》,但就算拍咗,然後呢?都唔會好似以前咁爆。香港已經唔再係一家大細坐係電視前面睇劇的年代,而係各有各精彩,每個人都有自己嘅螢幕發光,可以對住笑著忙。

再嚟就係因為而家嘅TVB乞人憎—你話使唔使呀?又講呢啲?唔係使唔使嘅問題,形象差咗就係差咗,總之而家嘅後生聽到TVB就皺眉頭,然後就開口屌,而家佢地嘅港劇已經同個「膠」字扯上關係,要洗,談何容易?

所以無論再投放幾多錢,請幾多個影帝嚟拍,寫個更勁嘅劇本,都好難打敗「以前就係好啲」呢個定律,何況以上嘅TVB根本唔會做—亞視都執埋,使乜咁出力?

由此可見,TVB重播《大時代》,係正確嘅,甚至好快就會再出現類似亞視嘅「歲月留聲」時段,好似某隊英超班霸一樣,懷念過去的光輝日子嚟打飛機,觀眾又有得打,高層又有得打,大家都開心,幾爽呀!

香港人,就係喜歡紀念紀念再紀念,今年六四,維園見!睇完仲可以返去煲大時代大結局(好似係)!