大時代係我唯一一套會發癲狂追嘅神劇,我鐘意嘅程度係可以三日之內睇晒40集,果三日係一起身就煲劇,煲到2、3點頂唔順先瞓幾粒鐘再煲過(應該大把人癲過我)。

拍得成依套神劇就一定要歸功一位當年29歲嘅監製,如果當年有人同韋生講我「食X多過你食米」,「你要咁咁咁咁咁」,咁就食屎喇。

cctvb 依排重播神劇,我就晚晚半夜捕住架電視。今時今日睇返,我完全有另一番好深嘅感受,因為我一路睇就一路就聯想到最近發生係香港嘅事。

我聽到方進新(劉松仁)彈 bridge over troubled water 嘅時候,我就諗起首歌當年改篇咗做華東水災主題曲,果陣香港人覺得血濃於水仆到去捐錢救大陸,今日呢?好多大陸人覺得「沒有中国,你們香港一早完了」,一副不可一世嘅恩主姿態,依個咪忘恩負義嘅完美示範囉。

我見到丁蟹打到人爆晒缸仲係度話人善被人欺、馬善被人騎,我就諗起當日班差佬任意打人,仲要話自己已經好克制。

講到丁蟹,佢其實係成個劇最深印象嘅角色,近排好多人話丁蟹係隱喻共產黨,因為條友橫蠻霸道,歪理連篇,自我中心,咩都覺得自己係啱晒, 仲要係有好強控制慾,我覺得依個隱喻真係一流,以上形容用上現今香港政府亦非常貼切,依啲係咪叫一脈相承呢?

(年少時我只知丁蟹就是我老豆)

至於另一個隱喻就係藍潔瑛,葉一知老師覺得玲姐(藍潔瑛)好似香港,甚至可能係對香港嘅預言:

「點解玲姐咁似香港?明明係講理性文明(讀到F7在那個年代殊不簡單),點知畀丁蟹搶咗,點講唔愛丁蟹佢都唔聽….最後,到了夠鐘嘅時候(五十年?),玲姐都畀丁蟹玩死埋。嘩,簡直有點預視咗香港嘅命運。」

而我就覺得大時代仲有一個對香港嘅預視,而且仲好恐怖,佢就係方進新同方家。

方進新好地地一個叻仔俾丁蟹打傻咗,之後方家家道中落。如果方進新/方家係文明嘅香港, 丁蟹係野蠻嘅共產黨,韋生好可能一早就預料香港會俾蠻野嘅共產黨攪衰。

丁蟹後來去醫院探傻咗嘅方進新,丁蟹吐返舊食淨橙俾佢食,方進新仲笑口噬噬對住丁蟹覺得好似皇恩浩蕩咁,咁咪即係話有啲香港人傻到唔知邊個害成香港咁,俾啲垃圾佢當仲當恩惠。

後來丁蟹仲賤,襯方進新傻咗灌輸一番是非癲倒嘅歪理俾佢,倒轉頭話佢先係衰人

丁蟹話:「不過人蠢啲都好,好過你以前聰明過頭,走精面;道義放兩旁,利字就擺中間。你今次咁樣都仲救得返呢,都算係菩薩慈悲,俾多個做人機會俾你架,你以後真係要洗心革面、浪子回頭至好呀……」

方進新仲差啲信佢,好彩之後有阿玲(藍潔瑛)提點返。依段直情就係講緊洗腦教育,講緊共產黨對心智未成熟嘅人灌輸歪理。如果大家有小朋友嘅真係要好好教導佢地明辯是非,唔係分分鐘第時俾人洗咗腦認賊作父。

之後方進新俾丁蟹打死(依段睇親都流馬尿),最後由佢個仔方展博報仇,可能當時韋生已經覺得香港嘅舊時代會過去,要靠新一代去救返香港。

最後都係要講多次劇中令我非常感觸嘅一段對白:

方進新話:「如果你好鐘意依個地方,你唔想走呢?」

阿玲話:「咁就要掃走班污糟邋遢嘅人」

香港人記住要自己爭氣。