圖片來源:Kevin Poh

圖片來源:Kevin Poh

宣讀政改之後,林鄭話點選特首係人大決定,咁即係默認香港政府跟本無權話事喇,不如妳認自己係一部播音機就算,上次搵部播音機出嚟談判跟本就搵你笨,同部大陸播音機談判把鬼咩。

政府係咁叫人袋住先又唔承諾選舉機制可以修訂,人地昆O靚妹都會話我會同老婆離婚喇,依家連大話都費事講,又或者佢連講下都唔敢,O靚妹你都昆唔到喇,仲信政府講嘅特首選舉可以改進嘅人真係連天真嬌都不如。

依家曾鈺成先投後辭,湯家驊擺明轉晒軚,689、林鄭擺出一副食硬你嘅樣,真係分分鐘仲有人投共轉軚令政改通過,如果通過咗,然後呢?然後咪袋一世囉,唔係天真到信佢會改呀,到時香港一直爭取嘅民主進程就玩完。

尋晚睇大時代聽到一段對白真係差啲喊咗出嚟:

方進新話:「如果你好鐘意依個地方,你唔想走呢?」
阿玲話:「咁就要掃走班污糟邋遢嘅人」

如果香港人你仲係好鐘意依個地方,你唔想走嘅,今次一定要自救,唔好再信政府啲咩談判係讓步,政府根本就無權話事讓步或者修訂點選特首,作為香港人想救返香港就做自己可以承擔嘅事喇,無論再佔領又好,學羅定人又好、強制罷工罷課罷市都好,總之唔好束手待斃。

不過希望抗爭者可以好好聽下陳巧文一段語重深長說話:
「下年7.1又係留守,到警察清場抬人,咁咪交咗功課,好似仲激咗,其實係乜都無,做返同上年一樣嘅嘢有乜用呀?」

唔好再對抗爭形式墨守成規,就算自己唔讚成人地嘅方式都唔好阻止人

仲有係今次唔好張焦點放係爭取民意度,唔好再理啲咩民意調查,因為大陸已經放水落嚟攪到全民皆股,有咩事個市跌,班股民就一定會反對抗爭者,今次俾人鬧少句唔好阻住發達已經係 Bonus。