見到一位友人 Wing Wing Mak quote人話而家大時代全民皆股會唔會一下爆bubble無晒啲錢正式進入Great Depression,經過呢幾年嘅見聞我又有唔同嘅諗法。

傳統嘅睇法就係,個市不斷被托高但係無本錢,就會被推爆。呢個定律係喺九七年亞洲金融風暴一嘢chok低四小龍引證到。當年救市嘅係由當時係財政司嘅曾蔭權牽頭,金管局入市,最後先叫化到個即時危機。至於手尾,我就覺得無執過。
而家十幾年過去,中後段零八年加多個海嘯,但係六年後嘅今日又多一個大時代出現,而且零八年中國舉辦奧運,正式成為強鄰(當住先啦),就係「政策市」呢個現象抬頭嘅時候。「政策市」有個特點,就係同蝗蟲一樣,「神又係佢鬼又係佢」。中國數據向好固然係好消息,正所謂大國崛起;但係數據表現唔得咩?sorry都係好消息,因為「阿爺會放水救市」。

呢個都係我當時決定唔做炒股神童(其實本來都唔係)嘅原因。頂你老味咩Q都可以chok做好消息,即係都可以咩Q都chok做壞消息啦。

衰啲講句,丁蟹效應都話可以買本tvb周刊睇下節目表睇準佢一話播即刻出晒貨佢避一避吖!

我平生最唔擅長嘅就係估人諗乜,尤其係老海鮮個腦點運作,我真係識條鐵咩。當時又咁啱就嚟公開考試,大條道理cap埋最後嘅水之後拍拍屁股拉隊走人。

自從零八年開始,我同班炒股同學都知道基本嘅理論唔再可能足夠我哋係股市生存。本來要執嘅公司可以因為「佢唔執得」就要用公帑保住,即使佢根本無心執靚盤數。當時嘅我哋諗,連美國都要咁樣做,真係滲出蛋蛋的共產味,仲唔係「共產黨最高興」?

天涯隨處皆阿爺,度度都要玩估領袖,不如縮返個頭入去讀多幾年書,順便慳返啖氣暖肚啦。

就係咁幾年又過。一二年開始讀書以外嘅文章,開始知道讀歷史嘅重要,就知道有好多嘅定嘅嘢,其實唔係事實。起碼知道經過WWII之後,零八年之所以托市其中一個重要嘅原因係要推遲WWIII 出現。

日本迷失再加地震,但係呢幾年開始有人發現日本只係無以前咁風光。要維持一個國家嘅運作,其實未必需要做咩一方霸權,只要經濟sustain到啲人生活就可以(當然日本係咪真係做到我有懷疑,況且我覺得即使之前唔係迷失,而家都開始迷失,唔係因為韓國扒頭,係因為本土產業維持唔到之前嘅水準)

反之,中國嘅崛起又係咪真嘅呢?有人話係,有人話唔係。

中國係一個喺經濟上係半封閉嘅國家。人民幣到而家仍然唔可以自由兌換(如果唔係點會有一個二個「離岸中心」吖),但係一樣可以搞亞投行,可以經幾個離岸中心影響環球市場。雖然係柒係賤係土豪,但係基於要避免戰爭嘅大前提,無一個國家/國際聯盟會再因為中國嘅人權狀況或者其他失德而輕言開戰。而對中國而言,一日唔開戰就無人知佢真正嘅軍事實力。同樣道理,世界大戰係由蕭條引起。如果無一個國際級經濟蕭條,都唔會挑戰到中國經濟嘅抗逆能力。一日無呢兩樣嘢出現,半封閉嘅中國就可以隨心所欲去表現自己想表現出嚟嘅「大國形象」。所有房地產,基建,金融,只要一日仲有資金流,中國就可以充落去。而呢個亦都符合其他政府想做嘅:做一舊大嘅熱錢,就可以喺個balance度繼續借返呢舊錢返嚟然後轉返錢出去,政府(同其他融資企業)就可以繼續有錢用,就可以做一個經濟差唔多復甦嘅樣,從而換取更多時間去令個經濟真正復甦/轉型成功。

(我感覺到我呢段應該喺金融concept度錯撚晒sosad)

講到呢度,等我copy吓自己先:

「要維持一個國家嘅運作,其實未必需要做咩一方霸權,只要經濟sustain到啲人生活就可以」

如果係套落中國,就變咗:

「要維持一個國家嘅運作同維持自己就嚟係真。霸權嘅形象,其實只要門面經濟sustain到,啲人仲生存到,仲有人發到做有錢人嘅夢(嗯,馬雲馬化騰仲有小米)就可以」

吹一個汽球點樣永遠吹唔爆?就係吹吓停吓,然後一直扮吹緊。
老海鮮點樣push啲細?「你知道我下個就升你。」

好一個中國夢。