職業無分貴賤係一個好古老既話題,已經比人講過千千萬萬次。到底做醫生係咪特別高尚,做地盤工人就CHEAP啲?係功利既社會嚟講可能係,但依個世界上每種職業都有佢嘅重要性,你冇醫生既話病左可能只可以等死,但如果醫生冇製藥公司整藥既話佢做到既野都好有限,冇麻醉藥你又點做手術?而冇左地盤工人既話全世界既市民都可以瞓街,就算醫生你幾有錢都冇用。將職業分等級既其實只係人類本身。

啲人睇職業首先就係睇錢。好多人覺得醫生律師人高要工係因為佢地要讀好多書,只有最精英嗰班先做到。但咩叫精英?係咪一定要做到醫生律師先叫勁?聽聞一個金牌SALES一個月要搵十萬都唔係冇可能,而單計人工既話,大家口中屬於賤既裝修水電工建築工人一個月要搵兩三萬都係閒事。筆者讀過HRM既HD,老師同我講做到HR既MANAGER月入大約有兩萬左右(錯既就怪我啊SIR啦),換句話講一個經理應該係連你地口中既裝修佬都不如。好多人為左可以係中環甲級寫字樓返工而努力,但做寫字樓好啲其實係上一輩既感覺,因為當時好多人都係做苦力拉下人力車咁,唔多識字,特別係英文。做到寫字樓既都係讀過下書,大學畢業。而家香港人工最低嘅反而係班文員仔,啱啱出黎做野拎住果月薪八九千交埋家用卡數真係屎都冇得你食,反而去做SALES要搵萬二三起跳就唔係一個大問題,當然文員比SALES優勝既就係返工時間朝九晚五比SALES日日企十個鐘放工返到屋企可能晚間新聞都睇唔到好好多。

計我話,返工最重要係搵一份啱自己嘅。明明你覺得對住個電腦打住千篇一律既文件好悶、明明你覺得日日係度開會開到你就黎瞓著,咁點解你仍然要死守住做文員仔依個諗法?因為你啊媽覺得咁先有出息?你深知自己其實更鍾意做其他工作,不論係SALES又好巴士司機都好,只要你會做得比做文員開心,咁份工已經係更加適合你。做唔到坐冷氣房既員工唔代表你人生已經玩完,雖然香港而家乜野都貴,但同時商機都多好多,唔做員工做老闆一樣有得諗。豆花米線點樣發圍相信唔洗我多講,簡單啲有個女仔係日本代購美少女戰士既產品都可以搵到唔少錢。只要你覺得有機會,你想做,咁就已經係去做既最好理由。自己冇錢又唔可以借屋企人幾百萬嘅,同人合資又好,返住工儲錢再創業又好,只係睇你肯唔肯做。

做醫生係好正,我去私家睇醫生見我五分鐘就收我二百幾三百蚊。但比我揀既話我諗我會鍾意咁樣寫文多過去寫病假紙。做唔到醫生律師咁又點樣?做到自己鍾意做既野,比起做所謂嘅精英更加有滿足感。唔好因為自己唔係人地口中既叻仔叻女就睇唔起自己,只要你肯努力做咩都有發圍嘅一日。行行出狀元依句說話唔係老點,信我。