我有。

以前小學睇完呢齣節目,返到屋企就戇鳩鳩搣左塊橙皮黎食,仲要學埋片入面個學生諗「我要吃得苦」!

後來先知橙皮得個苦字,而且表面仲要有農藥,真係多得傻校長唔少。

教育電視曾經係一眾小學雞上堂時候嘅寄托,上堂聽書,就悶到就快訓著,但講到「有電視睇」,就算內容同上堂教嘅嘢冇分別,但對住部電視就係覺得有趣啲。

除咗傻校長之外,以下呢兩個節目我都覺得好經典。

細菌大王呢個節目,細個睇覺得好驚,分咗上下兩集,第一集就講啲菌幾威幾勁(教傳染途徑),下集就講人類幾勁點樣消滅病毒(治療和預防方法)。不過片入面好多傳染病都收皮得七七八八,如果而家要重拍,肯定要加返禽流感同沙士。

呢個數學節目以白雪公主做題材,有好多集,小學雞時期覺得公主好索,當然而家睇返就……

其實心諗,我最懷念唔係教育電視嘅節目,而係可以睇教育電視個段無憂無慮嘅時光。個陣香港雖然已經「回歸」,但都未有今日咁仆街(何況仆街極都係老豆老母頂,唔關我事),我地唔使煩第時點買樓,最多係煩「一陣係老懵董答問大會,無卡通片睇,好慘」。