HKET20130314TA01BP

(圖片來自經濟日報)

最近CCTVB做緊套關於調解嘅劇,我心諗想用套膠劇宣傳調解就真係窄啲,但係套野叫做講到下調解員角色係點、同打官司有咩分別、程序如何等等,比起之前政府係咁賣廣告叫人做調解但係又唔講調解係乜都叫講多咗啲。不過咁,主流媒體始終都係無講到調解行業嘅遊戲規則同行業實際情況係點,如果有志成為調解員嘅讀者可以參考一下本文,而無諗過做調解員嘅讀者都可以睇下依家調解嘅實際情況係點。

就由我點解想做調解員開始講起,我之所以想做調解員就因為見到
“專題:兼職和事佬 時薪$3,000″
http://hk.apple.nextmedia.com/news/art/20130319/18200377

三千蚊個鐘嘅兼職聽落真係筍到爆,於是我就著手去搵調解課程。係 google 搵到一大堆又調解中心、調解協會等等,原來有咁多調解組織,睇到頭都大,玩下手加埋考試費仲要成萬幾銀,最後叫做搵到個平啲嘅,上堂之後先開始知道香港現時嘅調解體制係點。

香港的調解體制

依家香港其實係無一個單一標準試去考核調解員,要加入調解行業就要通過本地或海外調解評審機構各自嘅考試去考核,點樣可以通過這些考試呢?就係去參加依啲機構嘅課程,而唔同機構都有自己一套調解方法,就好似武林有唔同門派一樣,如果你拜入少林門下你就係少林嘅人,如果你要轉會就要重新學過另一門派武功再考過試,因為你根本唔可以用少林武功走去武當考試 (依家最大門派應該係調評會)。而考到調解員之後亦都要加入依啲機構先可以接生意,要加入依啲組識就自然要守佢嘅遊戲規則,如果咁唔好彩你同個組織夾唔嚟要轉會就要重新嚟過。亦都要諗清楚入咗會後好大機會要每年儲夠學分先可以續會。

調解員係咪筍工?
如果一份工有成三千蚊一個鐘,而調解嘅入門資格只需中學畢業,應該大把人爭住做先係,不過現時全職調解員可謂寥寥可數,據聞唔夠10人。點解會咁呢?唔係好好搵咩?問題就係調解員係香港好難有足夠生意維生,以政府大力推動嘅金融調解為例,2012年到依家係唔夠50宗case。

點解會咁呢?以我阿Sir 嘅講法,原因大致有幾種:

調解未普及,社會認知極度不足
好多人只係聽過調解個名,但係調解係做啲乜就好多人都唔知,幾個月前仲係有人問我調解員係咪政府工。就以以下一則新聞為例:
“日前有交通運輸業工會代表接受記者訪問時表示,擔心調解後被車主沒收一萬元租車按金"
http://hk.apple.nextmedia.com/news/art/20140125/18604290

依個例子顯示出香港大眾仲未知調解係做啲乜,以為調解好似法庭裁判咁有個人去決定結果。其實調解係要由雙方同意下進行會議,會議會由角色中立嘅調解員做主持協助尋找解決方案,要雙方得到共識先會簽協議書。(依點cctvb都有講,不過可能套野無人睇)

法律界襲斷調解行業
好多時市民遇到爭議嘅時候都係會告上法庭用法律解決,但係法庭其實會叫訢訟人先行調解,除非有合理理由,否則係會罰錢。

市民告上法庭嘅時候都係會搵咗律師先,當法庭彈返佢出嚟要做調解果陣,因為市民對調解無咩認知,又唔知搵邊度做調解好,咁自然就會搵返律師介紹邊度做調解,而法律界好多人都會介紹返法律界嘅圍內人做調解,好少會轉介俾其他獨立調解員,結果整個調解行業就俾法律界自己壟斷返。

律師兼任調解員的角色衝突問題
市民對有法律背景嘅調解員通常都覺得比較有信心,但係其實法律界人士兼任調解員係有利益衝突存在,大家諗下相比起律師費,(高至)一個鐘$3000嘅調解費用簡直微不足道,個律師又點會想你調解成功呢?啲律師會同當時人講單官司你赢硬喎,調解做下樣咪得囉(假調解)。仲有果個調解員係律師介紹,即係律師嘅自己友,阿自己友咪會幫手"搓喎"單調解等個律師有生意做囉。

題外話
要澄清一樣野,調解並非一人讓一步

雖然我無再續調解會,但係學到嘅調解同談判(調解同談判係有唔同,談判會講籌碼同唔洗中間人都得)技巧對我都仲係有用,其中一樣我好想講嘅就係“一人讓一步“,好多人覺得調解就係一人讓一步,一人讓一步係咪可以解決到爭議呢?

我學嘅調解係唔主張一嚟就叫雙方讓步先,老套啲講就係先搵雙方嘅 hidden agenda (背有利益),然後搵一個對雙方有最大利益嘅方案,就講一個簡單又老套嘅例子,有兩兄弟爭緊一個橙,如果我係佢地調解員係咪一嚟就叫佢地一人讓一步將個橙一人一半就解決到問題呢?

作為一個調解員係要搵出佢地爭個橙嘅背後意思,最後可能會發現佢地爭個橙唔係為咗個橙,而係阿哥覺得阿媽偏心俾個橙細佬,解決方法可能係叫阿媽帶兩兄弟落公園玩,件事同表面見到個橙其實無咩關係。

當然實際情況係無咁理想喇,不過要搵真正解決方案就應該先努力搵雙方 hidden agenda(係難度好高嘅部分),而唔係一嚟就諗“一人讓一步“,調解唔一定講妥協。

咁調解係咪可以應用係任何情況呢?梗係唔得喇,調解嘅先決條件係雙方對等(其實雙方去得調解就點都有啲理由),唔係有一面可以大石砸死蟹或者明恰你,明恰你果啲同佢講調解就嘥氣。

至於調解可唔可以解決到政改爭議呢?可能有啲幫助掛,不過調解仲有一個先決條件係出席會議嘅人有足夠權力代表佢果一方,即係要係佢果一方話到事,咁政府搵邊個話到事嘅人做代表?我覺得689自己都話唔到事喇,至於抗爭一方又搵邊個做到代表呢?

(利申:本人曾考取調解員資格但現已退會)