210e

多得咖啡小姐,而家一提起殘廁,大家立即諗起既就係 gathering。點解咁多人鍾意喺殘廁搞野?因為好多地方都有、使用率唔高、地方又算大、最緊要係免費。香港人識用殘廁做炮房可算係物盡其用,但唔該大家要了解一件事,殘廁其實同男女廁一樣,係比人用黎大小便嘅。你霸住男女廁入面嘅廁格,都叫仲有一兩格比人排隊用,但係殘廁通常一層就係得果一個,用嘅人仲要係行動唔方便嘅非健全人仕,有冇諗過如果佢地人有三急,但係發現有一對男女喺入面啪啪啪嘅話,佢地要去第二層嘅殘廁係要用幾多時間?

好多野大家冇實際經歷過係唔會明白果種感受:一個坐輪椅嘅人如果冇人扶住,冇馬桶旁邊果條扶手嘅話,佢跟本起唔到身去唔到廁所。殘廁使用率低係因為好多傷殘人仕根本唔想出街或者自己都已經插左尿袋,但咁唔代表殘廁就可以比你用黎做其它野,因為始終都有需要用殘廁黎去廁所嘅人。當你好急嘅時候如果你發現果層嘅男女廁封左嘅話你都會講粗口然後飛奔落下一層,但係對一個行動唔方便嘅人黎講一個用唔到嘅殘廁就足以令佢地絕望。其實唔止慾火難耐嘅男女,好多清潔工人都鍾意將殘廁當做雜物房放哂啲地拖水桶喺度。好多商場嘅殘廁都唔可以發揮到佢應有嘅作用,只可以淪為其他人為左貪方便而當成私人多用途室咁。廁所就係廁所,係比大家解決排泄需要嘅地方,要放野嘅係放係真正嘅雜物房,要扑野應該返屋企或者上時鐘,當然你唔介意喺後巷冒險搞真人騷同犯法嘅我都唔會反對。

香港人對包容依個詞好反感,但係香港社會的確好多傷殘人仕需要我地體諒。佢地本身嘅生活已經有好多不便,我地唔應該為左自己嘅一時方便同埋快感,連佢地喺街上面有廁所如廁咁基本嘅權利都搶走埋。應該同殘廁扯上關係嘅係屎同尿,而唔應該係啪啪啪嘅 gathering。