(本文內含少量計算分析)

成日就有人話香港無咗東江水會唔掂,今次就同大家溫故知新講下東江水。

歷史簡介

首先重溫下東江水歷史,50年代尾華南發生春旱,香港水荒,有班親中人士「獻計」由廣東輸水香港,當時港府恐怕命脈受制中共而進退兩難,但係當時香港獨立供水系統缺乏, 最終都因為社會壓力,60年簽約輸入東江水解決短期水荒,62年香港再水荒,於是進行東深工程建輸水管令香港直接輸入東江水。

之後港府開始研究海水化淡技術開拓水源,直到67暴動,英政府知道香港喉嚨唔可以俾中共渣住,決心發展獨立供水系統,加高船灣淡水湖,建萬宜水庫和樂安排海水化淡廠等設施相繼落成,之後東江水變成輔助作用。

可惜之後因為84年簽定中英聯合聲明,英政府認為香港前途已定,所以停止再發展獨立供水系統,之後香港輸入東江水比重開始增加,86年比重至50%,91年至80%即係大約今日嘅比重。而進入90年代後,香港工業北移,用水量亦大幅下降。

到97年後,有關東江水嘅荒謬事件相繼出現。

98年由於粵海投資(下稱粵海)因經營不善同盲目投資等原因攪到借咗錢無得還,爛數又收唔返,結果要債務重組,2000年廣東省政府向粵海註入東江水99%股權,就係咁, 香港人啲錢就被間亂黎嘅公司攞咗黎幫粵海填氹。

2006年尾政府以環保為由簽咗「彈性取水安排」,2008年起開始生效,「彈性取水」實情係政府一早簽定打後幾年買幾多東江水同俾幾錢,之後每月按實際需要輸入東江水,但係之前簽定個買水量都係有凸,錢就照俾凸,用唔到嘅水就留返益大陸,話就話環保,其實當香港人水魚咁襟。

舊時講完,返黎現在,香港輸入東江水比起馬來西亞輸水去新加波貴200幾倍,港人買東江水成本每立方米約4元(未計過濾等成本),但係賣俾深圳約0.96元,東莞約0.5元,香港人唔覺水費貴係因為政府對水費有補貼,但係唔好忘記政府啲錢好一部分都係市民俾嘅,即係市民中咗掩眼法俾貴咗錢都唔知。做咩香港買水要貴咁多?唔通香港同東江水無議價能力咩?非也!

 

東江水議價籌碼:

香港係粵海最大單一客戶

香港其實係粵海單一最大客戶,13年香港買水佔粵海收入46.8%,計算如下:

『根據香港特別行政區政府與廣東省政府於2011年簽訂的2012至2014年度香港供水協議,於2012年、2013年及2014

年三個年度,每年對港供水收入分別為35.387億港元、37.433億港元及39.5934億港元。

年內,對港供水收入增加5.8%至37.433億港元(2012年:35.387億港元)』

資料來自13年年報:

2013 粵海收咗香港 $ 3,743,300,000,

13年粵海總收入 $ 7,990,015,000  (年報第4頁第4頁"收入"一項)

香港佔粵海總收入=3,743,300,000/7,990,015,000 x 100%=46.8% (有錯請更正)

大家亦請留意每年東江水價加成6%

粵海有46%收入來自香港,作為粵海經濟命脈都無資格講價咩?有人會話無水我地都唔掂喎,咁香港係咪無咗東江水就無水用呢?

能否取代東江水?

首先會介紹一下近年香港嘅供水同用水狀況:

(資料來自水務署)

2000-13年香港用水量其實無大增加,由9.24 – 9.67億立方米上落,05年後更出現見頂回落。

至於香港供水唔係水塘就係東江水,而水塘水供應量大約佔全年耗水量20-30%,但係最差情況係04同11年只佔11%。

大家依家對香港自身用水/供水都有初步概念,見到最差情況係東江水佔9成用量係咪好灰呢? 又唔洗嘅,只要香港係開源節流下功夫,重奪供水自主權絕不是夢。


開源:

– 建新/擴充水塘

以6-70年代技術黎講,起水塘都會搵大山谷去起,政府之所以建做船灣/萬宜等水庫就係因為可以起水塘嘅大山谷用得七七八八,香港剩低嘅大山谷據聞仲有東涌谷同梅窩谷,至於以現代技術可唔可以係度起到水塘就要等專家研究。以前亦有議員提出擴充現有水塘規模,但被水務署以破壞水塘附近環境為由拒絕,至於擴充水塘係咪真係會破壞環境我都好想有專家驗證。

– 建新水庫

香港似乎再無船灣咁大嘅海灣靚位,不過規模細啲嘅海灣起多幾個都有可能,但係會遇到收地問題,當年起船灣同萬宜就因為令附近地方水位升高而浸咗好多條村,當時政府係起過啲新村俾村民移民,今時今日要做到咁似乎要政府有好大決心先做到,仲有就係要過環評,不過最近嘅環評報告都不乏被人質疑,例如點解龍尾灘依個污水灘適合改成人工泳灘。

其實我好希望以上觀點係錯或者顧慮太多,因為如果可以攪到水庫同水塘係可以提供大量平靚正水源,又或者以現代科技我地可以係離島起個大水兜而唔洗搵個山谷都攪得掂,如果大家有唔同觀點請更正。

不過大家又唔洗愁喎,雖然攪水塘水庫可能有難度,但係貴少少同或者供應量依家仲未確定到嘅方法係有架。

– 海水化淡

經多年「提議」後,政府終於係2012年研究海水化淡,2020年係將軍澳會建成中型海水化淡廠,初時供應量為0.5億立方即佔全供應量5%,廠房更可進一步擴建至產0.9億立方即佔全年用量10%。

而必須留意嘅係成本,因為用咗新技術"逆滲透",再唔係樂安排時代嘅蒸餾法,到時香港化淡成本「減低」至每立方米12元,未來科技發展亦會令海水化淡成本進一步減少,相比依家經處理後東江水成本約8元,即係未來化淡價比東江水現價貴30%,但係東江水價就每年加6%。

// 根據香港特別行政區政府與廣東省政府於2011年簽訂的2012至2014年度香港供水協議,於2012年、2013年及2014

年三個年度,每年對港供水收入分別為35.387億港元、37.433億港元及39.5934億港元。 //

小數就怕長計,每年加6% 10 年後會係咁:

東江水過濾後 = 8元

東江水來貨價 = 4元

即過濾等成本 = 東江水過濾後-東江水來貨價 8-4 = 4元

東江水由於污染日益嚴重,過濾等成本可能10後會再提高,不過暫時當過濾等成本不變 = 4元

東江水來貨價10年後

4*(1+6%)^10 = 7.163 (複式效應)

10年後東江水過濾後  7.163+4 = 11.163  (有錯請更正)

照咁計法10年後東江水會同化淡成本相近(12元),甚至更高(因為科技發展減少咗化淡成本),其他國家會認為海水化淡相對其他水源成本高而張化淡作為輔助,但係香港就唔同,未來香港海水化淡甚至比主要水源(東江水)平,所以再起多個大一倍產量海水化淡廠對香港係極有吸引力,即佔總用量20%,到時海水化淡+水塘最差供應量= 10%+10%+20% = 40%

要留意香港海水化淡成本一直令人質疑,因為臺灣成本為3.85港元,新加坡3.8港元,美國加州3.57元,以色列3.1港元,做咩鬼香港貴成3倍? 真係點解釋都好令人信服,希望只係因為初時技術未掌握所以咁貴,之後會平返喇。

咁我地係咪就要係咁起化淡廠呢?其實仲有平啲同無咁大能源損耗嘅方法,不過供應量有幾大就暫時未有確實數據。

– 再生水/污水/雨水再回收

參考星加波將污水/雨水回收再處理,處理後用於工業用途例如洗地、洗車、淋花、沖廁(香港沖廁有15-20%係用淡水)。

依家香港都有污水管排放系統,不過污水會管同雨水管會駁埋令污水被雨水溝淡再排落海,如果可以污水/雨水回收再用係一個唔錯嘅平價水源。而香港渠務署06 年開始係昂平試驗再生水/再造水,已驗證可以作工業用途,現時香港有沙田、昂平等污水處理廠,但係都仲係試驗性質,產量好低,例如沙田就只出產到1000立方水。

香港淡水資源珍貴,政府應盡快加大應用再造水,亦要盡快擴大加強雨水收集系統,依家渠務署有係新建政府建築物試驗多孔透水路面同天臺雨水回收然後過濾作非飲用用途,依方面應該可以多加發展,香港甚至可以學習新加坡張街道回收雨水轉至地下雨水管將來作更有效管理,不過香港人可能又要經多年“提議“政府先會做野。

除咗開源,其實節流都係實際辦法

節流

– 更換老化水管

香港原本水管老化非常嚴重,政府2000年開始用15年時間更換老化水管,原本01年滲漏率高達25%,至12年仲係18%,據報道14係16%, 預計工程15年即今年完成,而政府解釋水管滲漏應被視作一種運作限制而非浪費,

資料來源:http://www.devb.gov.hk/tc/legco_matters/replies_to_legco_questions/t_index_id_7699.html

但係又睇下其他地方嘅滲漏率,韓國為12%,新加坡為6%,日本僅為3.6%,人地可以做到咁低滲漏率,香港嘅水管設備係咪有好大進步空間呢?

資料來源:http://www.hket.com/eti/article/95a77d14-840b-47aa-83c0-95d15e8bcb38-346215?source=print&printable=true

– 改善淡水沖廁

根據水務署數據,香港80%人口用海水沖廁,04年每日用海水沖廁達 742,530立方米。

資料來源:http://www.wsd.gov.hk/tc/water_resources/water_treatment_and_distribution_process/seawater_for_flushing/

照咁計淡水沖廁佔全年淡水用量約6%

計算如下:

總沖廁用水量(海+淡水) 742530*365*100/80 = 338779313

總淡水沖廁量為總沖廁用水量20%=100%-80%(海水)

總淡水沖廁量= 338779313*20%= 67755863

即佔全年用水量約6% (有錯請更正)

淡水水源都猛猛緊,慳得就慳喇,政府可以繼續擴大海水沖廁,亦可利用再造水沖廁。

– 大家都慳啲用水

大家都可以慳啲用水幫一份手嘅,例如係用花灑沖涼同埋參與用水效益標籤,詳情可參考:

http://www.wsd.gov.hk/tc/plumbing_and_engineering/wels/index.html

除咗淡水自主權外,香港面對東江水問題仲有一個快將面臨危機,香港同粵海簽約到30年保證供水最高達11億立方,但係近年因為珠三角發展已令東江水開始唔夠分,前幾年前珠三角更出現水荒,不過由於粵海與香港有合約同埋香港以超高價搶水先會水荒都仲供水俾香港先,如果到30年合約到期香港都未有代替水源到時唔知分合約要點續,可能係天價賣水俾你,甚至分唔到足夠水俾香港。