209b

仲記得當年王維基申請唔到個牌冇得開電視台,個個都喺度話「香港電視已死」、「以後扔爛部電視唔洗睇」、「維基開到台我日日淨係睇佢」。但到左而家,雖然仲未叫做攞正牌,但總算叫做下載個Apps就有得睇,想喺電視睇都係買多個盒哂你小小時間Set Up。但問題黎啦,除左開台果日之外,收視一直有跌冇升,個個都覺麻煩,最後選擇睇返果個一開電視就睇到嘅TVB。就算Keep住用Apps追嘅,又話什麼一劇不如一劇,離唔開TVB劇情之類。羅馬非一日建成,TVB嘅爛劇你挨左十年八載你都忍到落去,但HKTV只係播左果十套都冇你就話人地唔得。唔做又話冇得你揀,但做又話人地唔得,依頭話佢似TVB嘅垃圾劇,轉頭又返去睇TVB。香港人犯賤到咁,香港仲有邊個去救?

我明白大家對HKTV嘅期望好大,希望有佢嘅出現可以令電視業有返小小競爭,等TVB有動力去做返好似天與地同尋秦記依類令人津津樂道嘅劇集。但話哂好多香港人受到TVB公式劇洗腦多年,對住TVB覺得悶,但當HKTV嘗試用新嘅手法角度去拍你又話唔慣。童話戀曲依類嘅音樂式劇集其實同GLEE係同一類型,唔知點解大家睇TVB買GLEE返黎係J2播唔覺得有問題,反而HKTV自己拍你就話唔係個個都啱。咩叫個個都啱?老豆死左日日家嘈屋閉爭身家爆金句?定係夜媽媽返到屋企老母等你門為左同你講句煮個麵你食?又要人地比新鮮感你,到做比你睇啦又話太IN接受唔到,你既要求同香港班警犬既說話一樣咁令人摸不著頭腦。

其實唔止HKTV,單單睇雨傘運動都已經睇到問題。人地瞓街冒住比黑警打咁去爭取普選,你就話阻住你返工你要正常生活。我唔知係香港和平得太耐,定係港共嘅洗腦真係咁成功,你要由小學讀到大學拎張沙紙都要用你十幾年時間啦,爭取普選你想你就咁講一聲然後三分鐘後就搞掂?而家人地用佢成日成個月嘅時間去爭,你就連行多五分鐘既時間都唔肯用。一味淨係識係度嘈嘈嘈,但到去做果下你又怨怨怨,日後香港玩完,要多謝既唔止果班唔能夠稱為人嘅垃圾藍絲,仲有你依班講就兇狠嘅純正港人。