《我是歌手》呢個節目自從宇宙瘋蝗漿嘅第二季之後,喺香港嘅知名度都不錯。最新嘅第三季第一個就淘汰陳潔儀,最近一期又淘汰埋本應保送入決賽嘅主持人古巨基。唔少人都繼續鬧爆《我是歌手》只理鳩嗌,而靚聲有感情嘅歌手強國人就唔識欣賞。戴番個頭盔先,好唔好聽呢啲野好主觀嘅姐,我講下意見你又參考下唔洗咁嚴肅嘅。

第三季陣容的確幾強大,首先有韓紅,佢係幾自大,集集都喺到晒佢啲伴奏真係有啲煩,仲要其實規定唔可以講野架喎原來。聲係靚高音係清,但首首都係咁個人就覺得有啲悶啦。孫楠又係一個靚聲王,一開口係有震住全場既靚聲,但本身冇乜留意佢,唱法感覺過於炫技不太岩我。反而最新果集唱嘅《突然想愛你》個人都覺得幾好聽,用最原始嘅方式演釋得比較好。

胡彥斌算係創作型啦,個人覺得佢嘅改編都幾好聽,算係幾成功嘅改編,幾合理又有種嶄新既感覺。可能有人會覺得佢既唱腔有點兒油膩啦,我就覺得接受到。台灣代表A-Lin實力無庸置疑,真係高音靚低音厚,其實我覺得大家都可以留意下佢嘅中低音,女歌手低音落得咁順又唱到高音算係幾勁架。而張靚穎把海豚音好靚,個人覺得最新果集加海豚音真係似炫技多,姐係鳩嗌,所以其實我覺得首忘情森巴舞改得唔成功,加上佢最近揀歌越黎越奇怪,我係欣賞佢嘅挑戰精神,唔擅長就演釋得唔太好都算正常嘅。

到岩岩俾人淘汰嘅基仔,雖然大家都話主持人保送,但我又覺得佢平均表現都唔差,歌路係窄但食住情歌王個名都不俗,個人覺得佢俾人淘汰嘅呢首《匆匆那年》算係最好嘅一首。《父親》都幾好聽,可能係個人情感影響啦,真係望唔透點解呢首會包尾。嚟到受港人擁戴嘅陳潔儀,唔洗我多講,靚聲有感情,我十分認同係強國人唔識欣賞,但大家都知啦,呢啲比賽結果都係圖片只供參考嘅姐,又講多句其實佢首首我都聽到喊,真係冇得彈。

補位嘅李健個人幾鍾意,一種靈魂嘅感覺,唱歌唔係激動派,連高音位都係好輕描淡寫咁就上左,我就覺得佢同陳潔儀係同類型的,只希望佢唔好又無啦啦俾人淘汰啦。而曇花一現嘅李榮浩個人覺得佢係遺珠之憾,首歌比較深奧,唔似普通情歌,需要比較多時間去欣賞。踢館成功嘅譚維維,蘋果都劇透話佢嗌高音攞第一,的確係高音嘅,但感情表現其實幾好呀。

其實我覺得又唔可以咁盲目地鬧話唔嗌就唔得,好多人其實可能冇睇過就一味鳩鬧,古巨基唱《情人》攞第一又唔見蘋果動講下,香港之光喎大佬。但古巨基同陳潔儀呢啲深情派歌手俾人淘汰的確係可惜,只可以話節目為左保啲自己人淘汰走啲外人啦,就例如古巨基呢集竟然俾人淘汰咁,個人真係覺得比佢差既大有人在。你都可以話係啲觀眾唔識欣賞嘅,但啲演員又欣賞到啲咩呀,你估啲七情上面係發自內心架咩。但睇返其實又唔係話高音就高名次嘅。係,韓紅成日都第一,但你知啦,佢份人咁串,攞左兩次第六就發晒老皮。個人意見係,排名呢啲野就唔係佢嗌唔嗌高音既,睇佢係咪自己友嘅姐,張靚穎同譚維維都係超女出身,韓紅又咁大牌,你懂的。

頭盔係繼續要戴嘅,雖然第二季我冇睇晒,但都係覺得今季整體唔錯,改編既大部份都幾好。雖然個人覺得改編技術唔錯嘅胡彥斌已經被淘汰,但李健呢類靈魂歌手都幾值得期待,起碼唔洗似上季咁個個禮拜都俾某啲編曲激一激啦。