圖片來源:壹週刊

圖片來源:壹週刊

截至今日為止,流感已殺110人以上。當中更包括壯年人士,傳染病專家袁國勇預料疫情持續多四至六周,可以做成5-600人死亡,而沙士死亡人數係299人,即係流感死亡人數可以大過沙士。

自己條命點會唔緊張,緊張埋人地條命就更偉大。03年因「揭發」沙士而被稱為英雄嘅高永文,當時臨危受命為醫管局總裁,係電台節目中更哽咽講出: 「願辭職承擔所有責任」,沙士過後高永文淚別服務多年嘅醫管局,着實令當時唔少香港人感動。

十年後一個白鴿轉高永文重返官場,貴為食物及衛生局局長,更一度成為民望最高官員。今日見死咁多人,高永文對全港戴口罩有以下論述:

「如果去到全城戴口罩,佢會產生另外一個效果,呢個效果我哋叫佢做社交疏離」
「由於暫時有不同意見,他指很難下決定要全城戴口罩」
「有病的人應戴口罩,無病的人戴口罩只屬輔助性作用,因手部接觸亦是主要傳染途徑」
「所以其他人可因應自己情況考慮,如到人多密集、空氣又不流通的地方應戴口罩」

成段說話充滿矛盾,叫我地去人多空氣唔流通地方就帶口罩,我地搭巴士、小巴、地鐡甚至辦公室全部都係冷氣地方,空氣唔流通,好多香港人有一半時間都身處依啲地方,其實同話全港要戴口罩都差唔遠。人命嚟架,你個 「社交疏離」 緊要定人命緊要呀? 你有幾難決定呀? 有咩咁難講嚟聽下囉,定係唔講得架?你仲係唔係當年踢爆沙士個高永文呀?

今日見到棠哥(歐綿棠)面書留言:

「我突然想起南韓歲月號客輪慘劇,學生們就是聽話的待在房間等候而遭難,結果,叫他們守候的船長率先棄船而逃了。」
「香港人,自救吧。」

我好贊成呀,自己條命就自己緊張返喇,人太聽話係會害死自己,帶返個口罩,尤其病咗嘅唔該顧下其他人,係公司見到啲人幾個星期係咁咳係咁打乞嚏又唔帶口罩真係你唔驚我都驚,仲有以下集合咗一啲專家意見,大家可以參考參考:

  1. 洗手,洗一次唔夠,洗夠兩次,以皂液揉搓雙手二十秒
  2. 減少做長時間劇烈運動,運動後一定要保暖,好多成日跑步嘅人都知跑得步多係會仲易病
  3. 保持充足睡眠
  4. 注意飲食,減少進食煎炸食物及火鍋
  5.  避免用手捽鼻及口
  6. 注射疫苗

大家保重吧!