係,我知呢套係強國片,甚至連「中港合拍」都唔算,我呢個咁法西斯嘅人冇理由走去睇,但鬼叫個導演叫彭浩翔,彭導放棄唔到三級片,我一樣放棄唔到彭導。

成套戲嘅脈絡好簡單,條大橋甚至係照搬《春嬌與志明》過嚟,有幾似?聽住啦喎:

《春嬌與志明》:春嬌同志明本來好好,但志明北上溝咗件索到震嘅大陸妹,但係同春嬌仲係藕斷絲連玩曖昧,拉拉扯扯過後當春嬌決定放棄個陣,志明又忽然明白到自己最愛嘅始終係又老又巢皮,但係勝在同聲同氣嘅過期港女余春嬌,最後志明係春嬌臨走之前又追返佢,楊千嬅竟然會撼得贏楊冪,完!

《撒嬌女人最好命》:張慧(周迅)同恭志強(黃曉明)本來好好,但小恭去台灣溝咗件「騷浪賤」台妹(隋棠),但係同張慧仲係藕斷絲連玩曖昧,拉拉扯扯過後當張慧決定放棄個陣,小恭又忽然明白到自己最愛嘅始終係唔識撒嬌粗聲粗氣,但係勝在有共同回憶嘅女漢子張慧,最係小恭係張慧臨走之前又追返佢,周迅竟然會撼得贏隋棠(呢次尚算合理),完!

無錯其實彭導嘅戲來來去去都係個幾招,佢啲戲始終係好睇在入面show出嚟嘅小聰明賤橋,雖然講唔出咩大道理,但係又好抵死咁囉!

呢套戲係取材自同名嘅愛情工具書,識撒嬌對女人嚟講的確好重要,用得好等同於一張唔使找數嘅信用卡一樣,可以碌到盡,碌完一張又一張,不過我覺得港女們已經唔需要學撒嬌,佢地已經將港男馴服到狗一樣,港女港男之間係S&M嘅關係,女王係從來唔需要向奴隸撒嬌,甚至係大街大巷打男友十四巴都OK,所以我諗港男睇呢套戲唔會有咩強烈感覺,因為即使係戲入面嘅周迅對佢地嚟講都係溫馴小綿羊嚟囉,呵呵!