759第一次令大眾關注係因為比香港兩大超市聯同供應商聯手打壓要求759抬返高商品既價格,但係759本住薄利多銷既政策寧願唔再入口有關貨品改為直接由日本入貨。佢依個舉動挑起左一直挨貴價貨既香港人既情緒,令到大家一面倒去幫襯759。時至今日,供應商唔敢再嚇759,因為佢已經變左一個大客,而且因為佢貨品既價格公道亦都令黎759買野既人愈黎愈多。而家既759唔止零食開下一間又一間,更加搞埋家居、化妝品、雲吞麵同麵包鋪等等。到底759係咪已經變成左另一個霸權?

霸權係指有接近絕對既控制權。睇下北韓同中國,一黨專政無法無天,你要話佢地係霸權體系不足為過。但係759而家極其量只係叫做有影響力,因為係佢最搵錢既零食當中仲有惠康百全零食物語之類同佢競爭,係其它行業更加唔洗講,759雲吞麵同黃枝記你會揀邊間?化妝品更加唔夠各大專櫃牌子黎。所以有人話佢而家樣樣生意都做係打壓返小商戶轉頭,我唔認同。佢開雲吞麵都講明左係頂左人地間鋪黎做,麵包鋪都只係開左第一間。何況佢冇抬高材料批發價,亦冇叫人唔好比貨其它店鋪,踏踏實實咁賣麵整麵包又點算係霸權?

除此之外,係咪所有霸權都一定衰呢?係古代既群王制入面,王就係一切同法律,佢有對國家既絕對管治權,亦即係霸權最完美既演繹。但係世上一樣有明君既存在,處處為人民著想,盡量唔勞民傷財。而759亦都只係冇外面既商家咁下下賣貴你幾成都一兩倍價錢。賺小左,但賣返多啲,條數一樣係返到。而且有759依類薄利多銷既商家,最收益既始終係我地小市民。睇下果支綠色有氣礦泉水,超市廿幾三十蚊一支,出到街食飯收到八九十,點知係759買既話除返開六蚊左右就有交易,如果你係支礦泉水既忠實Fans,你瞓著都識笑。

而家最影響小商戶生存既係貴到痴左線既租金同埋供應商迫你抬高個價黎賣。759冇做啲乜野唔見得光既舉動,亦都冇叫日本果面既供應商唔好比貨李家誠。佢只係本住件件貨都淨係賺小小既心態去對抗下下賺到你最後一分一毫既大型超市。單單係佢依種敢做既心態已經好難能可貴,我都唔理佢私底下759盤數得唔得,有冇蝕住做,最起碼759既出現令到兩大超市係好多貨品方面都要減價迎戰,依點亦都係我地市民最樂意見到既。

好在香港都仲有不怕強權企出黎對抗既人,而佢亦都成為左最好既教材去話比大家知以卵擊石唔係一定會輸。所以當我地再次面對港共政府去對抗佢地既時候,唔好再以為冇可能,唔好諗住一定輸硬。只要有決心,冇野係我地做唔黎。