伊波拉病毒(1996)

伊波拉病毒(1996)

係高登,耐唔耐就會有人問飲食業有咩唔見得光嘅秘密,而好多曾經做過飲食業嘅巴絲就會入哂嚟好樂意咁分享佢嘅經歷比大家知。筆者曾經都係一間餐廳做過兩年兼職,所謂廚房嘅秘密其實都接觸唔少,廚房師傅食住煙炒菜其實唔出奇,跑馬日嘅午市晚市都好易出現「炒場」嘅情況。我曾經都聽過有朋友講佢自己嘅經歷,佢嘅經理應該係黑心界嘅精英,所作所為聽到我有段時間都唔敢再去果間連鎖店到食野。但係衰格嘅始終係少數人,只係咁啱比人爆左出嚟先令到大家都覺得全個飲食業都係咁嘅樣。飲食業,其實唔係想像中咁黑暗。

到底個客係咪永遠是對的,其實視乎當時你嘅身份:你做緊嘢,咪覺得多要求又黑面嘅客根本就係一個仆街;到你做客,唔覺唔覺就會做咗你心目中嘅仆街。「阻人放工尤如殺人父母」,一間餐廳十點鐘LAST ORDER,其實廚房睇情況可能九點半已經開始洗緊野。你九點十一衝入去叫個雲吞麵同生炒骨,然後同個侍應講「兩樣嘢好快姐」,但其實就要麵檔同隻鑊一齊加返水開返爐去煮你果兩味然後又洗過。做得廚房性格都會豪邁小小,咁一路煮一路問候你同你親人自然小不免,如果咁啱撞正師傅輸波輸馬心情唔好,咁你果兩味野都唔方會好食得去邊。至於會唔會加料依個問題我做果間就冇啦,最多係炸物跌咗落地一樣執返上黎比你。衛唔衛生?起碼我做咁耐未聽過有人因為咁而食物中毒先囉。

不過收工先有客嘅話唔止飲食,基本上咩打工仔都會唔鍾意。就算係賣衫都好啦,正常營業時間去到十點,但永遠都會有人十點之後仲試緊衫或者先決定去排隊比錢。雖然放工時間係十一點,之後係仲要執衫,但客愈遲走執衫數錢嘅時間就愈後,遲走嘅機會都愈大。如果你到十點仲要求多多話要換大個碼要件新嘅,入到個倉SALES咪一樣會好似廚房佬咁用三字經話你,然後搵件有小小甩線再包一包當新咁賣比你。仲有好多其它服務性行業都係咁樣做嘢,只不過係飲食業嘅野你要食落肚,所以你先覺得特別大鑊姐。但唔好唔記得如果佢地真係玩到咁大,你食完嘢唔舒服嘅話,你一搵食環間食鋪就有大把手尾跟。冇邊幾個打工仔會冒住冇咗份工既危險都要玩死你,最多咪對住碗麵打乞嚏。

所有打工仔但求都係做好哂野準時收工,雖然寫住十點鐘先LAST ORDER,但去到九點十一,你都見到佢地執緊個場洗緊地,有返小小同理心,就比人地早小小收工返屋企啦。你的確可以話「仲有五分鐘有咩理由唔比你食?」講道理你係啱嘅,但係咪成間餐廳都願意為你一個客而個個遲廿分鐘收工冇得早走?法律都不外乎人情,咪食住間廿四小時老麥先,聽日早啲再嚟幫襯,唔好搞到自己好似大陸人,以為有錢就大哂咁樣。而做樓面嘅,咪睇下廚房有邊個檔未收哂野,之後好聲好氣叫個客「不如揀乜乜乜食啦」,如果個客係都唔聽係要食其他野嘅,你咪到時先再黑面囉。

其實飲食業只係好真實咁反映返香港打工仔嘅心態,講黑暗邊夠政治圈,又黑金政治又被自殺咁。仲有娛樂圈陪瞓上位啊、空姐幫機師解決生理需要啊、黑警放蛇順便食霸王雞啊、醫生係手術室做做吓手術玩自拍之類,我覺得手指插落碗飯比起以上咁多樣野都算係小巫見大巫。真係咁擔心阻人收工會比人加料嘅,咪早小小去食,或者轉間開到兩三點嘅餐廳囉。