潮流興講愛國。你唔愛國咩?689 同人型龍蝦就整個「新青少年軍」,用軍訓式洗你腦,有D 人覺得唔會洗到腦,但你睇下班慈母就知啦,一句「你哋無做錯!」佢哋就J到出血,連暗角黑警,都好似無事咁,更有傳變成「警隊七雄」。呢幾年真是講左好多愛國,好似唔愛國就係香港人的罪咁。事實上,唔愛國唔係香港人的錯,係香港人「自古以來」就唔係咁愛國。用成龍大哥的講法就係「切忌跟車太貼,保持2秒距離」,總之錢我可以運上去,人你就唔好叫我返大陸。 今次想分享幾個小歷史,講下香港人如何愛國。

中國鍾意講自古以來,就由香港開埠1841開始講!英國宣佈統治香港後,宣佈香港係自由港,歡迎任何人來香港工作。當時香港好多野撈,吸引好多廣州人落黎生活同工作。當時中國官員點睇,兩個字:「奸民」!大陸一開始就因為英國人的緣故,睇香港唔順眼。喂!你都講左人地係叛國賊,你教我點樣可以在統治者眼中,做一個愛國的叛國賊。

第二樣,香港人是不是好憎英國人統治?又唔見得好憎佢哋。難聽d講,當時養香港人同養豬無分別的,有飯食,有女屌,香港人就好滿足。當然,在動物農莊入面,豬入面都有拿玻崙啦!當時香港華人領袖識自救,識埋英國人堆,唔賺銅錢咪賺英鎊囉!盧亞貴及譚亞才就係呢d 人,今日的上環廣福祠、文武廟就係佢地出錢起,用來接濟落黎的奸民,間接擴大落黎香港賣國賊。人數一多,就成為華人的領袖。他們有無講愛國呢?對唔住,係無!頂盡都係愛落黎香港的中國人,即係清政府口中的「奸民」。

到英法聯軍之役(1856-1860),香港人一定葉問上身,個個打十個鬼佬啦掛!?Sor 9 ry, 都係無!反而見到清政府終於要班「奸民」仆街死,廢事句句粗口,有當時的命令係咁講:「為洋人服役所謂沙門(servants 的中譯)者,限十日回家,不淮逗留。違者緝獲治罪,並罪及本家親屬。」大家諗下,你移左民10年,無啦啦中國叫你10日返黎,唔返黎我就搞你鄉下的親戚!真係惡過進興同義豐加埋,but this is china。結果市民局走,香港果幾年特別差。

不過英法聯軍最精彩都未講!當時香港首富李陞(高陞戲院係佢地起,仲有李陞小學紀念他)更加捐現銀十萬蚊,請壯丁,支持英軍打天津!!!商家佬真係無死錯人,英國打贏仗,李陞仲分到一部份的戰爭賠償,同埋頤和園的古董!!至於市民,最緊要有得食,有女屌,唔好逼我愛國啦,這種心態是香港人的早期的愛國方式,到今時今日都好常見。所以,唔知香港史的人,唔知英法聯軍咁精彩,知道的話你就會發現真係一巴一巴咁刮落中國學者到。

東華醫院現在兩個大牌匾,光緒皇帝畀的,讚佢地捐好多錢,幫左好多中國人。這一點同現在好相似,香港人係鍾意捐錢的,但叫佢上去出力呢,佢地寧願晚晚ot好過。當時的東華總理李陞、何啟、後少少的韋玉,全部都只是捐錢,有無愛國愛到返去工作,好似伍廷芳果d 咁呢?當然無!總之錢我大把,拎左錢唔好搞我。

更加有趣的是東華總理何啟、韋玉。他們兩個真是好彩係生係香港,生係二戰一定變成被人鬧到汪精衛咁。事關何啟係「廣獨派」,在1898年曾聯同港督卜力、孫中山,暗中私會李鴻章,叫他兩廣獨立!韋玉都唔差,在1899年他公開呼籲英國人「操控及整頓中國的軍隊」!真係勁呀!一邊捐錢,一邊分裂國家cap 水。如果真係英國人控制中國軍隊,中國憤青會有前列線炎架,J極都J唔出。

講埋最後,1898年英國人打新界「六日戰爭」,中國出版的香港史書一定會寫到係好愛國啦,新界佬打英國佬,反帝制、反殖民主義,香港人終於打響愛國第一槍!真係打完阿群個身都抽一抽搐。表面係咁,但實際上新界佬點解會打仗?其實係驚英國拎左佢地的利益、土地,驚破壞風水,先至同英國人打仗(事實上大埔鄉民係一早縮沙無打)。當英政府打完仗,保證佢地利益之後,佢地即刻乖乖收皮,喵都無叫一聲。唉,歷史先生,又好再大巴大巴刮落中國學者到啦。講多少少,1860年北京條約後,英國開始拎九龍。拎九龍果時,村民有無拎鋤頭斬人呢?哈,都係無!

所以在香港歷史入面,香港至少在3/4的時間,愛的錢,唔係國。
在力同錢之間,香港可以捐好多好多錢,好似何啟、韋玉咁,但係叫佢番清朝工作,好似達哥話齋:「痴~孖~筋架!」

之後果100年,我睇下之後有無時間打,但我相信都好多人都清楚過我。

資料來源:阿群帶路Facebook 專頁