unnamed

掌相面相都係屬於風水命理既一環,好多人係遇到困難果陣都鍾意搵師傅去指點一二。到底風水可信性有幾高?我唔識答你,因為我曾經比過我既八字(即係出生年月日)一個學過既網友睇,結果佢講既野的確有七八成準,係未見過我個樣同唔知我係咩人之下可以得出咁既結果唔係單單好彩就講得通。但你話街邊擺檔果班師奶啊叔既話我就覺得似係斷估居多。咁點解我仲提議你帶女朋友去睇下八字?無他既,你講既野佢唔信,但風水佬講既就會信到十足十,咪當搵風水佬幫下口講多你幾句好說話。你問我點解風水佬實幫你?等我慢慢講你知。

街頭風水其實係捉你心理多過真功夫。通常男睇就話你有做老闆既潛質、個人幾醒目、肯下苦功就會有出頭天。前兩者冇咩人唔鍾意聽,後者更加係你啊媽係女人既演化,但聽完之後你就會覺得佢有啲料到。我曾經同女朋友係旺角街邊檔睇過,免費三分鐘入面講既都係好說話,對住我又係講上面果幾句,對住我女朋友就話佢係賢妻良母、會生仔既機會高、冇咩做野既運、第日都係做少奶奶。女人更加鍾意人讚,發夢都想自己男人可以蒆起自己,就憑依幾句我女朋友已經覺得個師傅係神既化身,專登落黎指點下佢。而係三分鐘既尾聲,佢睇一睇我女朋友隻掌,然後就話佢假桃花多,要兩年後先會穩定,又同佢解釋假桃花即係會拍拖但最後唔會係真命天子。一聽到依度,就好似睇卡通片主角準備出必殺技果陣就話今集完畢,我女朋友急不及待想聽落去。咁師傅見到魚已經上釣,就話免費就睇到依度,覺得準既幫襯下佢,師傅都要食飯咁講。話左冇問題之後,其實你唔難發現佢講既野同免費果三分鐘都冇咩分別,就好似我女朋友咁,大約都係話事業線唔夠好(手掌果條,唔好諗錯)就要靠多啲人,唔好怕怕羞唔敢叫人幫。點解師傅會咁講呢?因為由一坐低開始佢連想問咩都要我代佢同師傅講,師傅又點會睇漏眼呢?

至於點解我會話風水佬一定幫你?好簡單,要記住你係比錢佢果位,即係佢老闆。坐得係度幫你睇,緊係但求講到你開開心心聽落又覺得幾中咁,到「埋單」果陣咪打賞多少少比佢囉。就好似之前講到我同我女朋友都有假桃花,我女朋友既桃花運兩年後先穩定。係依個時候女朋友望一望我,咁師傅好自然問我係佢邊個?我又好冷靜咁答左佢一句「男朋友」。係聽到之後,依位師傅就馬上轉口風。「嗱,我睇佢面相呢,就好錫女朋友既。不過佢就唔識點樣表達,有時激嬲左你又唔知點樣只返你,係咪呢?」最衰我冇帶會考證書係身,唔係我應該會拎出黎指比佢睇我口試拎五星的,我最自豪既地方就係死淨把口,佢居然話我唔識講野。唔知係咪怕得罪我,佢又補多句「我睇佢命中都有好多假桃花,但唔係佢去溝女喎,係啲女過黎搵佢,所以唔關佢事嫁。」我見師傅咁睇得起我,我都唔好意思當住佢面大笑出黎,唯有對住佢微笑一下。你問佢講既野準唔準咩?真係見仁見智,佢有野同之前果位八字網友不謀而合,亦都有啲明顯錯到離譜。但如果講服務滿意度就應該比滿分佢啦,唔單止起勢咁話我對佢好好好好,又強調第日有女性埋身都係因為我條命既問題。而我女朋友條命就唔岩做野,即係暗示第日有我養,唔洗佢做。見佢落足嘴頭,將三分鐘既說話再拉長到三個字黎講,而我女朋友又聽到笑到見牙唔見眼,咁佢問我仲有冇野問果陣我都話冇啦,比錢啦。「多謝哂,面相五百,掌相三百。」我差小小就噴血,十五分鐘收我三五百,你一個鐘咪好搵過律師仔?不過騎虎難下,而佢又真係講到我女朋友笑住咁走,就當係做善事啦。

就算你條命再差都好啦,只要你係老闆,個風水佬都會用佢既語言藝術再佢講到「其實都幾好嫁,係差小小運氣。等下啦,再等下就會好啦。」咁樣。如果你女朋友成日都唔信你岩佢,唔信你真心,不妨帶幾舊水去搵個風水佬。到最後你會發現,買隻千幾蚊既熊啤啤,都唔及你比三百蚊去請個風水佬去「點」下你女朋友。如果你信風水既,三百蚊指點迷津算平;如果你唔信風水既,三百蚊就令你女朋友覺得你係真命天子要對你好返啲,直頭係抵到爛。