下載 (2)

台灣史對香港人來講可能非常陌生,鮮有接觸機會之餘,香港人連香港史通常都唔太清楚,更何況隔住個海嘅台灣。但台灣歷史中,唔難發現同香港現況相似之處。

二二八事件係台灣二戰後一次規模非常大嘅反政府事件,國民黨隨後以軍隊鎮壓射殺示威者,並捕殺當地菁英同異議人士。當時台灣原本係日本殖民地,日本統治五十年後於二戰戰敗交俾中華民國。來自中國大陸嘅人來到台灣,唔適應充滿日本風情嘅台灣,對受日本文化教育嘅台灣人抱不屑態度,話佢地被奴化,被皇民化,而台灣人亦難接受大陸人嘅落後。除此,國民政府貪污腐敗,民不聊生。加上當時政府受外省人操控,政府之內只有少數台灣當地人。社會亦有歧視本地人情況,導致民怨爆發。

睇到呢到,會唔會覺得當時台灣背景同依家香港冇咩分別?香港同樣受所謂「祖國」嘅「同胞」指指點點,話我地崇洋媚外,唔包容佢地嘅中國文化。政府同樣倒行逆施,只顧既得利益者,將小市民視為無物。政府同樣被中國操控,議會中只有零星真正為香港嘅人。社會同樣歧視本地人,買野講廣東話反而被拒之門外。

唔同嘅係,我地未爆,或者,唔敢爆。

大部分香港人怕事,崇尚和理非非,連衝出馬路都嫌太暴力。就算依家已經有勇武派出現,但要多數人好似台灣仔咁勇武,至少要等多幾十年。簡單來講,就係民智未開。唔少人仲好天真,認為鳩坐民主就會戰勝歸來,高舉手機盞燈唱番首海闊天空所有問題都迎刃而解。

香港人目前最需要就係摒棄呢種死都要企係道德高地嘅心態。「唔好俾位人入」,實際上就算點和理非都有方法搵到位入。遊行就話噪音滋擾,燭光晚會就光污染,靜坐就霸住個球場搞到人冇得踢波。而且,出來唔係為爭取民主自由而唔係為爭取「爭取民主自由」個光環咩?有冇位俾人入,其他人有冇入個位,又與之何干?當時啲台灣人有冇擔心會俾位俾國民政府入?佢地有冇為阻住其他人搵食道歉?佢地組建嘅民兵團唔會係西門町做有機耕種,而係拎菜刀上戰場。

縱使二二八最後失敗告終,但讀歷史正係為左令人類唔好總是重複相同嘅錯誤。係到聲明,我絕對唔係鼓吹大家好似二二八咁打外省人,燒車組民兵。大家千萬不要這樣做。只不過當連企都唔肯,要坐低抗爭,而且仲要打住和理非嘅旗號,一個比國民黨更殘暴無仁嘅政權會怕嗎?