Facebook嘅Like同Instagram嘅心心差唔多,本意就係比你用黎對某啲鍾意或者認同嘅內容表示「我認同」或者「我鍾意」,畢竟有時見到好正既野都好,你留言又唔知留咩好。「嘩,好靚」或者「認同」好似太機械式,依個時候留個Like就最方便。可惜人總係鍾意將好多野嘅本意扭曲,係要將個Like由對單一事件嘅認同變為對果個人嘅認同。

就好似各大網絡女神喺Facebook打一句「我病喇」咁就可以有幾千個Like(我認我提子),但你Like乜呢,「你病?正啊,LLike!」我理解嘅意思就係咁樣。而情侶間當另一半放乜上Facebook或者Instagram都好,總要先Like一餐。我曾經有一個女朋友喺同我傾電話嘅時候同我講「你成日放埋啲唔知咩球星既相上黎,我好難Like喎。」但係我張張相佢都Like鬼哂。當然我冇同佢解釋果個叫KG,係我最鍾意嘅球星;亦冇回敬佢一句「我冇要你Like喎。」我只係哦左一聲。當Like比人濫用嘅時候,佢已經唔係表示Like,而係「閱」。有個人放左條片上黎,五秒後開始收到佢老死嘅第一個Like,三分鐘後有五個,但明明條片長十分鐘。你問佢鍾唔鍾意條片?「唔知喎,冇睇過。」當你再問佢咁你又Like?「啊邊個邊個放上黎,老死緊係Like啦!」

一個Like,對好多自家創作嘅人黎講好重要。因為佢可以係當係顯示一個人對自己嘅肯定,亦可以比作者本身知道邊類形嘅題材係會受歡迎多啲。但如果Like比人當係已閱後嘅按鈕的話,佢就會失去左個指標性。我唔明點解朋友間一定要Like佢所有野先係朋友,亦唔知明明講緊Sad News有啲乜值得Like。就好似一篇講警犬打路人嘅報導,Like嘅人應該只有藍絲,黃絲一係就Share開去,一係就留言詛咒隻警犬,但我搵唔到理由你去Like。第日喺Like之前不妨諗下你係咪真係Like佢嘅內容先?Like小陣唔會冇左個朋友,佢亦都唔會死。不過當然啦,如果你Like我講嘅野,咁留返個Like喺度就冇問題啦。