polymer-20141222

覺唔覺叫得周永康嘅都係人渣中嘅人渣?

古今中外我未見過一場仗嘅將領係會故意推自己嘅將士去死,而原因係純粹為咗「證明」一啲道理。

香港個位周永康就做到啦,呢鋪真係奇情過《火鳳燎原》,曹操你叻極咪最多識玩「濮陽練兵」,我地康哥玩嘅係「龍和銷兵」;賈詡用嘅「公子獻頭」一次都係一個頭啫,我地康哥嘅「公子獻頭」一嚟就推幾千個頭送上去比警察扑,最緊要嘅重係全部於現實上演而唔係漫畫老吹橋段,陳某你就認輸啦。

大家當日包圍政總都係拎個真心出嚟升級,就算結果如何失敗不堪都唔會有人苛責學聯,畢竟眾所周知升級行動無異於以卵擊石。但呢個想法只係建立於「學聯都係真心升級」嘅前提上,如果一開始就希望失敗,並想以失敗為退場藉口嚟呃市民到場進行升級,情況就完全唔同,有句說話講得好好,「千祈唔好呃人,因為你呃得到嘅都係肯信你嘅人」,學聯同周永康,你地呃完呢次,下次可能仲有人比你呃嘅,因為天下傻仔何其多,但肯定冇上次咁多人囉。

OK,其實呃人都唔緊要,呢啲嘢大家在心中咪算囉,但你可唔可以唔好懶醒上電視訪問大談行騙心得?咁叫啲比你呃咗嘅苦主情何以堪?塊面要擺去邊?比啲街坊指住笑係咪你周永康負責?我已經想像到啲藍絲群組而家講緊啲咩嚟抽水。

有人話民建聯最無恥,有人話民主黨更無恥,計我話民建聯加民主黨都唔及周永康一個人無恥。人地譚耀宗上電視比記者串都尚且會以笑遮醜,你周永康上電視直認出賣群眾,都竟然仲可以帶住一副「我係為你地好」嘅誠懇面孔,我真係頂你個「懇樣」唔順。

如果民建聯仲想保住「最無恥」呢個寶座,我強烈建議宗仔要係周永康完成學聯秘書長任期後將佢招攬過嚟,此子係不世出嘅政治人才。