旺角被清,龍和一役敗退,瘋警開始以殘暴手段對待市民,睇到市民頭破血流都可以唔嬲果個都唔係人嚟,不過不幸中之大幸係香港人靱力夠兼靈活多變,佔旺被擊退後立即報以鳩嗚回敬,鳩嗚比佔領更強,轉守為攻,唔需要集結物資,唔需要24小時留守,只要大家有時間就喺條街度行,唔小心跌下散紙都可以嚇到班差人發癲,基本唔洗硬拼,唔洗犯法都可以對警力有極大消耗,由於門檻低所以好受歡迎。

不過一個咁強大嘅鳩嗚係咪只有好處呢?其實我一位係朗X商場做嘅朋友同我講鳩嗚期間商場入面嘅小商鋪真係拍烏蠅喊晒口,好多商鋪星期六/日/假期對佢地係好重要,可以話係主要收入來源,持續拍烏蠅再加埋因為租約要繼續交貴租佢地可能要執笠,一生心血甚至成副身家都可能就此斷送,而689亦唔會因為小商鋪執咗而俾我地有真普選,仲會以為借口指責鳩嗚市民。

不過如果可以令以上情況只發生係支持689嘅建制人仕有關商鋪會唔會好啲呢?果班建制友仲會唔會仲咁盲撐仲要乞人憎到歪理連篇呢?689見支持小咗又會點睇呢?

我其中一個提議就係走入建制商鋪瘋狂 window shopping,情形就同鳩嗚差不多,基本上都唔會犯法,動員比抵制商鋪要嘅少,參與時間有彈性,範圍可以唔只旺角,而且對無辜小商鋪傷害減低。不過千祈唔可以為難店員 ,仲要確定果間係建制商鋪,而 window shopping 店鋪最好集中一啲對政府或689有影響力人士,否則好易跌入中共最鐘意嘅群衆對群衆圈套。 係抵制商鋪亦應同時進行,因為唔係間間鋪都可以做 window shopping。

我所講嘅其實都係一個提議,鳩嗚/window shopping 期間我地都要睇埋事態發展而不斷改善甚至變招,而 window shopping 亦可能只係刺激大家思維嘅其中一個環節,最重要係大家要多思考。其實抗爭係仲有好多可能性,過去兩個月嘅佔領已經試過去影響政府威信同消耗警力,689似乎對依啲野唔多在乎,我地以要試下從影響相關人等實際利益方面著手。

最後我想講雖然輸一兩場仗,最重要係面對失敗而不氣餒,我地要不斷改進,不斷嘗試先可以贏,否則會對唔住被打至頭破血流嘅抗爭者。

建制商戶參考:
藍絲 app 「藍色正義」

《全港不合作運動 – 抵制建制派商戶大行動》Facebook 專頁
《全港不合作運動 – 抵制建制派商戶大行動》抵制商鋪名單