Via. CCTVB

Via. CCTVB

立法會一役之後,泛民極速同有關示威者劃清界線,例如「被捕支援小組」出聲明話「不能接受該行動組織者的暴力衝擊手法和對大會糾察隊及其他同路人的不尊重」。之但係,乜啲泛民唔係最中意話「喺高牆與雞蛋之間,永遠企喺雞蛋嗰邊」咩?依家好明顯衝立法會嗰班示威者係雞蛋喎,點解你地唔企喺佢地嗰邊,重要拒絕提供法律支援,甚至講到明要同佢地劃清界線?

講到尾,泛民搞緊嘅係雨傘運動,係公民抗命。係靠「無陰功!點解我明明做緊正義嘅事都要受懲罰?」嘅悲憤,試圖「感召村民」。但係熱狗(唔妥泛民同埋去衝擊嘅,通通都係熱狗,好似係)做緊嘅,係革命,係靠「掉那媽!我地係符合道德地去爭取正義,點解要被人拉?」嘅激情去推動抗爭。叫衝立法會嗰班人出嚟承認責任,跟你地泛民玩自首,同叫孫中山自首有咩分別?公民抗命同革命係兩樣嘢嚟,根本就唔同,雙方理念南轅北轍而又不停發生衝突時,我睇唔到可以點「團結」。

本來,有人喺前線衝鋒陷陣,有人喺後面安坐,係人之常情,因為唔係個個都咁衝得,都唔係個個想齋坐。如果兩邊相輔相成,其實個佔領區可以好和諧好團結。問題係,人地準備好去衝你又阻住人衝,但係你唔想衝,無人迫你要跟住去衝喎!你要人尊重你個「大台」,咁就唔該「大台」都尊重示威者。派人跟蹤有唔同意見嘅示威者都做得出,唔爭在夾手夾腳綁起佢地交畀差佬啦!咁樣搞法,「泛民主派」真係沒有不分裂的本錢,你班泛民即管繼續劃清界線啦!到時大家各自努力,衝嘅唔使怕「左膠」拖後腳,泛民又唔使怕被示威者影衰「雨傘運動」,何樂而不為?