港視今晚就正式開台,好多後生仔都歡天喜地,但我想講嘅係,請你地唔好自己「柄」埋係房入面追《警界線》同《選戰》,你地嘅目標應該係大廳個部電視機!

你當初撐香港電視,可能只係為咗有多一個選擇咁簡單,但其實多一個電視台係可以有更大嘅作用,就係為而家一台獨大嘅局面投下一枚深水炸彈,令電視行業重新出現競爭,令而家嘅大台TVB知驚,的起心肝製作返一啲真正有質素嘅節目。

雖然魔童都話港視目標唔係TVB個二十點,而係唔睇電視個八成人口,但我覺得如果無綫仲保留到個20點收視,只會繼續自滿,節目繼續停留係現時質素,雖然我地仍然可以選擇睇HKTV,但始終唔能夠將觀眾利益最大化。

所以如果可以嘅話,我地嘅目標唔應該係房入面部電腦,而係廳個部電視。咩話?你唔敢同老母爭電視?屌你瞓街你就敢?夠膽佔中唔夠膽佔領客廳(部電視)?同埋而家唔係唔比睇電視喎,只係轉台啫,仲要係個好睇好多嘅台呀!我敢講你老母見到你呢個平時一食飽就衝返入房嘅衰仔,竟然肯出嚟陪佢睇電視,佢就最開心啦。

只有令TVB知道痛,電視行業先至真正會有競爭出現,我知要行到呢步係好難,唯有由今晚開始大家一齊努力啦!

P.S.:但如果你電視係舊款,裝唔到tv box,我都唔知可以點……