點解要去英國領事館追數?

四個字,合約精神。《中英聯合聲明》講明,英國有責任監察聲明實行成點,同埋要確保香港有民主發展,呢個責任打十號風球都打唔甩。家下中國粗暴干涉講好咗嘅「高度自治」以及民主發展,係違反《聯合聲明》所為。向英國施壓,要英國正視中國對香港所施嘅暴政,以《聯合聲明》簽署國身份介入,逼使魔鬼政權停手,遵守《聯合聲明》呢條受聯合國承認嘅國際條約,還香港民主、自治,此其一。

另一個原因,就係我哋唔逼,英國政府唔會負責任。自從香港主權移交中國,英國政府每半年都會交份報告書畀國會,簡述香港情況。但係呢份報告書交咗十幾年,都係是是但但,聲稱「一國兩制運作暢順,香港人嘅自由同人權受尊重」。呢個月月尾,英國國會議員組成嘅代表團會嚟香港調查《中英聯合聲明》實行成點。食住個勢,畀壓力英國政府,此其二。

團結就是力量

筆者我之前都有參加過佔領英國領事館行動。我哋輪流留守,每晚都係得三兩個人瞓領事館門口。即使人丁單薄,領事館都要派人出嚟以密室談判引誘我哋入去「deal」。我哋深信密室談判唔會令英國介入,英國最後一定唔認數,所以我哋拒絕咗呢個「deal」。三個人已經換到密室談判,大家諗下,三十個人、三百個人,係咪無得輸呢?

英國絕非外國勢力

中共成日出言恐嚇,要求英國唔好干預內政。都唔知香港人係咪以前睇得太多頭條新聞,以為中共真係自己「阿爺」。忍咗廿幾三十年,卒之行咗出嚟,但係又要怕中共唔高興,船頭驚鬼船尾驚賊。既然中共嘅邏輯係,越驚乜嘢,越係話嗰啲嘢唔好、無啲咁嘅事,既然中共咁怕外國勢力,點解我哋唔搵「外國勢力」介入?事到如今,我哋有咩好怕?更何況英國根本就唔係外國勢力!英國身為《中英聯合聲明》簽署國,係一個有責任喺聲明無做足時介入嘅國家,絕對唔係外國勢力。

係追數,唔係跪求

有好多人都認為唔應該「跪求英國打救香港」。事實上,我哋唔係去求英國人,而係要向佢哋追數。因為英國喺中國無做足聲明時,有責任介入香港事務。我哋只係要求英國做返應該做嘅嘢,就係咁簡單。

香港人主動逼英國履行《聯合聲明》,保護自己

中共政權連國際條約都違反得嗰陣,《基本法》又點會保護到香港人呢?正如南亞海嘯、日本地震,最快派包機接走香港人嘅,係英國,而唔係香港或者中國。Made in China,大家都怕。Made in Britain點都有保證啲啦?!但係單靠呢個保證係唔夠,我哋要身體力行,向英國施壓。正所謂「自己香港自己救」,11月21號晏晝4點鐘,一齊上英國領事館請願啦!英國領事館就喺金鐘太古廣場上面,好易去嘅。詳情可以留意Facebook page 「五百人佔領英國領事館」。

作者:南宮行