yq8iGboysj25HO4RqazqNStDcJi3inRuH1xJcIBaRVk

十三:不如你地先介紹一下自己先。

王生:我地係『港鐵故障消息』群組,成員大約有二十人,入面有港鐵職員,乘客代表,亦有專業嘅 IT 同事幫手搞網站。

十三:咁你地晌金鐘留守左幾耐呢。

王生:我地晌金鐘留守三個星期,呢個風力發電站就十一月四號 set 起,現階段做緊測試,因為機電設施始終要實際運作先知出黎嘅穩定程度同最終效果係點。而且成套系統都係「大陸野」,所以,哈哈哈哈。

十三:無錯,佢 spec 係咁寫,實際上佢跟到 spec 七折當贏。

王生:你淨係睇番地鐵大陸製嘅車,車廂入面每個 panel 都唔啱位,你就知道大陸製嘅……

十三:哈哈哈哈。咁點解會揀風力發電呢?

王生:主要有三個原因:第一,回應番政府偷電嘅指控,其實我地想講,我地無需要偷電。我地試過有帳幕比吹到離開左原位幾十米,既然咁大風,於是就諗,風力發電會唔會可行呢。第二,自修室用緊傳統嘅發電機,每五個鐘就要加一次油,但係每一次入油都起碼要用二十分鐘,咁樣對於自修室嘅同學黎講會係相當大嘅不便。而且長貧難顧,要靠巿民不停捐燃油,咁樣自修室好難持久。第三,呢樣就同我地團隊性質有關係。現代嘅鐵路根本唔可能離開電力,每一個部份都需要用電,所以唔同嘅國家都有計劃點樣將可再生能源應用用晌鐵路上面,但港鐵近乎無考慮過呢樣野。例如南港島線只有一啲象徵式嘅可再生能源設施,而現有嘅鐵路係直頭無考慮過使用可再生能源。

十三:唔止港鐵丫,就算巿民想自發去做,香港政府都唔鼓勵大家去做。

王生:係架,好似政府早幾年話資助巿民買慳電膽,咁點解唔係資助巿民去安裝可再生能源嘅設備呢。港鐵係香港入面最大嘅用電戶,但係晌可再生能源嘅安排係接近零,所以我地希望做一個示範出黎,起到鞭策作用,話比大家知,使用可再生能源並唔係一件好複雜,成本好高嘅事情,就算係小巿民,只需要好少嘅空間,都可以做到。於是,港鐵辦公室其實可以用可再生能源去照明,或者地鐵鐵路沿線有好多架空電䌫嘅柱,都可以安裝到風力發電系統上去。

ZYrsPa65zPJ9RVraGcaKdaDKaCQNidNKZGkCgZd5OuA,yVAWRyoGboDqVmGgPiFGlWnLkFfQx18dU__wApQZC0U

十三:經過呢兩日測試,呢套風力發電系統可以點應用落去自修室上面呢?

王生:我地現時測試嘅目標係同時為兩部手提電話充電,呢樣已經證實無問題。而今次我地係希望做到帶頭同示範嘅作用,所以成本控制晌港幣一千蚊以內,已經包含晒成套系統連帳幕,令巿民知道,大家如果希望支持自修室嘅照明需要其實一啲都唔困難,可能只係每人一百蚊,好快已經可以夠買一套風力發電系統,而根據現時嘅數據,我地預計只需要有四套呢個風力發電系統,就可以支援到整個自修室嘅照明用電需求。甚至長遠計,可以遍地開花,因為需要用電嘅唔止自修室,其實物資站同木工場都需要用電,尤其是木工場嘅工具現時要充電過程係極麻煩。當然我地只係一個帶頭嘅作用,之後就要睇下巿民會否樂意去資助呢啲設備。而現時呢呢測試站晌測試完畢之後,我地會重新整理過成個安排,最尾希望可以令佢變成一個自助充電站,唔使工作人員幫手都可以巿民自行幫手機充電。

十三:明白。咁黎緊天氣會越黎越凍,你地會唔會有考慮過安排一啲發熱裝置呢?

王生:因為發熱裝置耗電量相當大,所以成套風力發電系統都需要升級先可以支持得到,當然我地好樂意提供技術上嘅支援,但我地只係作為一個帶頭嘅作用,最尾都要睇巿民嘅支持程度。

十三:如果我想支持你地,我可以點呢?

王生:我地唔會收現金,只會收物資,所以我地遲少少會整理一個零件清單,巿民只需要買完相關嘅零件比我地就可以。依家自修室之所以可以用四個風力發電機就可以,都係多得巿民支持,將我地所有燈都換晒做 LED 燈,先可以實現得到。

十三:如果想聯絡你地,可以點呢?

王生:巿民可以落去金鐘自修室搵到我地,或者你可以打電話 8123-7908。

十三:多謝晒你接受訪問。

後記:

香港有心人很多,但政府同權貴成日想我地回歸嘅所謂「正常」,就偏偏唔容許我地做咁多野。香港政府成日講可再生能源,實際做左幾多,大家心中有數。反而今次佔領行動,令好多事情都得以解決同實現,例如自由行問題,塞車問題,甚至今日連風力發電都開始有人做。又想話呢啲咁高技術嘅野係外國勢力介入嘅證明?買現成中國製套件都算係外國勢力的話,除非中共對香港人黎講,只是外國吧。