前兩日,「中國歌手」鄧紫棋接受明報訪問,提出咗香港樂壇已經去到需要整個毁掉再重新建立嘅地步。鄧小姐好難得地得到了筆者嘅認同,因為佢根本就係要被砍掉的其中一部份。G.E.M參加我是歌手之後被冠上「香港樂壇小天后」一名。天后?敢問你自己對唔對得住呢個名?你身上真係有任何一位天王天后有既特質?

拎筆者比較熟悉的台灣樂壇黎比較一下,台灣嘅周杰倫、蔡依林點解會被稱為天王天后?因為佢地力求進步。周杰倫嘅音樂實力無庸置疑,即使成績未如理想,佢依然嘗試跨足戲劇、主持、電影,挑戰自己。蔡依林一直被稱為舞蹈天才,但依然係每首新歌作出新嘗試,芭蕾舞、絲帶舞、甚至當時未流行的vouging,每次都令人驚艷。相反我地黎睇睇G.E.M,由《where did you go》,《A.I.N.Y》,《Get Over You》,去到《泡沫》,首首都一大段高音ad-lib,鐵肺係好犀利,但係可唔可以搞搞新意思?

而近期G.E.M出咗三首改編歌,《你把我灌醉》、《喜歡你》、《龍捲風》,令筆者不得不講講G.E.M啲改編歌如何點燃起我心中的怒火。

《你把我灌醉》,原唱黃大煒以獨特嘅嗓音演釋出果種心痛欲絕嘅內心感受,然後G.E.M嘅改編令首歌變成左一首 disco舞曲,我真係望唔到你到底係失戀劈酒定開緊P。然後喺「我是歌手比賽」時改編左范曉萱嘅《我要我們在一起》,我真係好想知佢做乜事。我要我們在一起原曲比較平淡,用以營造一種似近還遠,看似觸手可及但又隔著銀河的暗戀無力感。而G.E.M嘅版本用上大量弦樂順利增加澎湃感,尾段再加返段強力高音怒吼,暗戀變成恐嚇,我真係心肝仔都跳埋出黎。

身為五迷嘅我不得不提果首《你不是真正的快樂》嘅快樂版,真係好難捉摸。相信各位五迷同筆者一樣都認為G.E.M完全扭曲左原曲嘅意思,原曲想寫出長大後戴住面具做人,明明滿身傷痕但又故作堅強的小丑心情,而G.E.M好似真係當咗自己係「小丑」,不停repeat我要你快樂,你係咪真係有睇過歌詞?定係你其實睇唔明歌詞,只係從歌名去解釋首歌講乜?

仲有其他改編例如《喜歡你》,大陸化嘅編曲令成首歌改得失敗,毫無感情嘅演釋方式,過火嘅林峰式哭腔,令呢首神曲被污染。再一首龍捲風,嘩好威威加左段RAP啊,但RAP並唔係幾下手勢就成事架鄧小姐,停頓位置、加上旋律呢啲較新既Hip-Hop文化你又知唔知?加RAP既翻唱方式令我諗起台灣樂團Magic Power上年演唱會翻唱左G.E.M 嘅寫不完的溫柔,佢地寫左段RAP作為唱者心聲嘅獨白(有興趣可以聽一聽  https://www.youtube.com/watch?v=bzoHawuzRpU) 。唔知創作歌手G.E.M又有冇諗過創作一段深入拓展唱者內心嘅RAP詞呢?仲有連龍捲風你都嗌,我真係冇野好講。

成個比賽入面,真係冇幾首係冇嗌過。係,我明白家陣啲歌唱比賽除左超級巨星之外,全部都只有鐵肺選手可以被注意,但可唔可以注意一下身為歌手最應該注重嘅音樂性?歌詞所描述嘅適合啲咩演釋方法你又有冇考慮過?歌手最應該做好嘅你都冇做到,又稱唔稱得上係小天后啊鄧小姐?

所以話G.E.M講得好啱,我諗佢可能係驚覺自己就係其中一粒樂壇腫瘤,良心發現先會有呢番言論?鄧小姐轉向大陸發展,開返場「中国巡迴演唱會」,無論係為人民幣服務定係因為香港人要切除腫瘤都好,都係筆者樂見的,你話係咪呀,哈姆太郎?

作者:女巫阿不思