返工要默默做,廢話唔好多講,特別係老闆壞話。依點差唔多係所有打工仔嘅金科玉律,何況係從政,仲要係建制派?所以點解建制派冇乜智商都可以做嘅原因就係因為佢地最多係講廢話,但甚少講反話。曾主席識諗,功力深,全靠佢鎮住一班細路建制派先冇成日投錯票,而佢身為打工仔都好識做,人前永遠都用到啲聽落還算可以嘅理由去幫政府執爛攤子。反觀田北俊雖然身在建制,但不齒同流合污成為低能,亦都覺得有諗法點解唔講出黎,所以就爆左一句「689你不如考慮下落台啦」。換轉成一般辦公室,依句大約等同「老闆你咁廢不如讓左間公司比人啦」咁上下。得罪老闆,最後緊係要承擔返後果啦,今日就咁比上頭彈走左。

站係打工仔立場,佢蠢到不可救藥。當住咁多人面前叫老闆摺埋,老闆仲要係小器果班,邊有可能全身而退?但係站返係一個人既角度,做到佢咁都真係唔錯。唔會為左份工而死擦爛擦老闆鞋,肯為左自己良心講返句人話。要知道長毛洋達之流打正反政府旗號,罵爆政府天經地義;但落台依句野出自建制嘅田北俊口中,又別有一番風味。毓民佢地罵政府或多或少都算工作需要,但田北俊講出黎絕對係個人意見,睇下政府咁快做野就知咩事。不畏強權我行我素嘅工作上或者難相處,但依種人做朋友真係一流,唔會對住你笑容滿面背後勁講你壞話,而係當住你面話你咁樣真係好唔得。或者佢唔係一個好嘅政客黨友,但做朋友識搵一定係搵依種人。

當然我地依啲小角色又唔係有錢,冇咁嘅本事去當面挑戰老闆。但係辦公室嘅假面具留返係朝九晚五對住果班老屎忽八公八婆就算啦,唔好為左份工改變埋你嘅人生價值觀,你都唔想變到葉劉麗芸樹根之流廿四小時咁人見人憎嘅,係咪先?