三十八點幾分的確係唔合格,但係唔合格嘅範圍入面,三十八已經係好高分。想當年(其實就係上年既事)我仲喺大專讀書,唔合格乃等閒事,就算搵幾晚去望下「碌史」都好啦,望唔多半粒鐘就冇心機去望佢。結果入到試場,乜都唔記得,唯有打天才波--中學都仲可以,因為用中文考,吹水冇難度,但上到黎用雞腸,雖然過去幾年英文略有進步,但要我用英文將心入面果堆偉論寫出黎又未得住。結果往往都係喺三字頭左右遊走,獲獲都要比多一百蚊補考。

雖然我未算盡全力,但我為左依三十幾分都叫下過小小苦功,追求過合格。最後合格唔到我唔會問點解唔鬆多兩分比我,因為係我真係冇點認真背過書。但有咩理由而家有條友擺明就唔考,我係擺明等肥佬你吹咩?考緊中史佢就寫法國大革命落去,問邊個發現西班牙佢就去寫孫中山。佢唔止冇試過去做好份卷,佢甚至輕視你,同你作對,係要喺1數學題上面寫首滿江紅上去。好啦,佢咁串嘴,零佢雞蛋再話佢唔尊師重道踢佢出校我都唔覺得有咩問題,但你而家派返份卷比佢竟然同我講佢有三十八點幾分?差小小就合格?改卷果位你盲左定收左錢吖?如果你出街食飯叫西炒飯但佢比左個豬扒包你,你會唔會唔屌佢仲比多三十八蚊貼士過佢?

我明而家香港好多方面都痴左線:警察痴左線、官員痴撚左線、藍絲帶班人不嬲都咁撚痴線。但最痴線嘅係英哥將香港搞成咁居然唔係負分或者零分,反而仲有成三十八點幾分?喺依一刻,我覺得做過問卷而又有比過分佢嘅市民都痴撚哂線。