早兩年你問我香港有咩男神級藝人,我通常都會答吳彥祖。有樣有身型,有錢有女人,基本上都冇得輸。當然佢嘅私人生活係點我唔會太清楚,因為我覺得就算係一個藝人,佢最大嘅本份都只係拍好套戲做好代言人。好似啊嬌咁衰咗係閃卡事件最多只可以話佢真係好傻好天真,但罪不至死。只不過係佔領行動之後,見到好多藝人為咗討好中國依個大市場,不惜指鹿為馬話警方冇錯,支持佢地。要知道一個藝人嘅言行係受到多方面嘅留意,你可以無知,但唔好無良。我唔係話藝人一定要支持學生,但去支持一班暴力成性嘅警犬,於禮不合。

係依個時候,基本上已經半退休嘅發哥唔現身出面幫學生講好說話,話佢地好乖好抵讚。就算隨後中國即刻將佢列為咩「不建議藝人」都好,發哥都只係淡淡然咁講一句「咪搵少啲囉」。一個荷里活巨星,坐擁近十億身家但仲係搭地鐵街坊裝行街市都仲好有男人味嘅藝人,直頭係香港版嘅奇洛李維斯。一個可以話完全「離地」嘅人,仲願意係鏡頭前講真說話,唔會置身事外事不關己咁樣,絕對配得上真正男神嘅稱號。可能你會話,佢上哂岸啦,大陸封殺佢一樣可以拍港產美國大片,佢大把本錢緊係唔驚中國。的確我認同唔拍中國片對而家嘅發哥黎講唔係咩大問題,但係對佔領行動保持沉默,耐唔耐再可以搵下人仔係更加簡單嘅事。不過發哥仍然選擇揀我口講我心,絕對係佢對自己香港人身份嘅一份承擔。

能力愈大,責任愈大,依點係千載不變嘅道理。但就算係成龍劉德華依類可以話係典範級嘅藝人都好,對住中國唔多唔少都要屈服一下。華仔都仲肯係早排講句學生唔應該受到傷害,我相信咁做已經係唔得失中共之下嘅最大限度。至於成龍,無謂多講啦,佢真係覺得自己係中國人又好,救子心切都好,佢有佢嘅價值我唔阻止,得閒小講幾句廢話就可以。其實望望明哥張敬軒杜文澤何韻詩,佢地仲有好一段嘅演藝日子都敢企出黎講心底說話,真係少啲勇氣決心都做唔出,我唔望香港其他藝人都學佢地咁樣冒住失去搵大錢嘅機會去做一刻民主英雄,我都明白你地要搵食,但唔去SAY YES都唔代表你要向運動SAY NO。當然,你唔好望學發哥咁支持學生就可以到達佢果個高度,因為發哥出黎支持學生唔係為話題為曝光率,而係一種純粹嘅心態,好似餓咗想食飯,渴就想飲水咁。發哥由心而發,做得自然,所以受到萬民景仰;但如果你有目的而去強迫自己支持或者反對,做到好似王晶咁高調奶鞋底嘅話,我係你就算吧啦,廢事惹人反感。