話說我今日食完晏見仲有時間就小睡一下,點知居然撞到關公報夢比我。關公一見到我就抓住我格硬要我坐低聽佢講野,咁我見佢右手拎住成把關刀,唔聽嘅話容乜易一刀劈死我?咪同佢一齊坐係地下。一坐低,關公就話「有乜理由我保左班契弟咁耐,而家居然話我阻街?正契弟!」關公契弟前契弟後,我都唔知佢講緊邊個,我咪問佢「啊關公,黑白兩道都拜你喎,你講緊邊班先?」關公望都唔望我就話「挑那媽,有分別咩?」之後唔知係咪覺得自己洩露左咩天機,拿拿林補多兩句。「我嘅意思係今次兩邊都有同一目標,黑同白都係契弟。」我「哦」左一聲,之後同佢講「佢地咁仆街,你唔洗保佢地喎,班友耐唔耐要做大事先燒支香拜下你,洗撚咁盡責咩。」點知關公低頭輕嘆,隨手拎左碗酒就一飲而盡。(唔好問我碗酒點黎,發緊夢嘛)

飲完碗酒又同我講「後生仔,點解我咁出名啊?就係有義氣夠忠勇。話哂兩班仆街,一班講義氣,一班講正氣,我又見佢地咁好死放我上神枱,咪耐唔耐顯下靈囉。唔係你估陳浩南真係咁好打,飛虎隊真係咁神勇咩?冇我佢地返左印度哋蕉啦!」我呆左一呆,心諗連發哥對白都識,利害喎。點知關公識讀心術,居然睇穿我諗緊乜。「平時冇野做咪上網睇下戲咁囉,好彩果間咩咩公司地府都鋪埋光纖咋。」關公見我同佢嗲得下,又拎多碗酒比我,我搖搖頭,話唔啦仲返緊工。佢又唉左一聲,話如果翼德都咁識諗就唔洗咁早死又有機會同佢一齊成仙,仲話以三弟既性格,肯定第一時間出黎砍尻班狗官。我同關公講,其實而家班差佬仲有正氣咩,唔陰質嘅野唔做,我有時覺得有部份黑社會仲好過佢地。關公就話:「死蠢!自古以來邊班官兵對百姓好?就講返漢朝丫,董卓當權之後,佢地見錢就搶,見女就搞添啦!其實不嬲都係要佢地個名做下樣姐,從來冇旨意佢地。」

關公用埋自己朝代做例子之後,我就更加肯定好仔唔當差。我見關公其實都唔係好鍾意班差佬,咁我又問多句:「而家佔中班市民都有拜你喎,咁你係唔係好應該都顯下靈幫我地?」點知我岩岩問完,關公就緊握拳頭,紅都面哂。「仲好講,我不知幾想幫你地!班細路先有義氣,手無寸鐵都敢出黎推翻暴政,好野啊。不過到而家大家冇哂血性先擺我上枱,我要顯靈都唔知上邊個身好。呢,得個長毛叫似D樣,不過人地成五六十歲啦,我怕上完佢身之後佢骨都斷十幾廿條。個四眼細路唔係唔得,但佢既作用就好似孔明先生咁,無時無刻鼓勵著大家,唔岩做爛頭卒嘅。」我見關公講得有文有路,加上話哂打過咁多場戰事,就想問下佢我地而家應該點做好啦,點知關公岩岩想開口,唔知邊條友係Office打爛隻杯,嚇到我醒左。

而家我訓極都搵唔番關公,佢係咪去你果度報夢?如果係佢,麻煩你叫佢救下我地點樣幫班學生,唔該。