睇見依家就住呢場抗爭(即遮打革命/雨傘革命/火鳳凰革命/佔領中環)有越嚟越多唔同嘅爭論,筆者我姑且提出六個原則畀大家參考:

一、自主行動
眼見好多「大會糾察」仆出嚟指揮自發群眾,我必須提醒各位讀者:每個出嚟嘅人都係獨立個體,應該按住個人嘅意志去行動。「大會」只須負責物資、急救,糾察、佈防係眾人之事,每個人都有權做。散唔散水,自己決定,唔需要聽大聲公講。至於琴晚鬧得火熱嘅路障問題,之後會再詳細講。

二、認清目的
為咗唔令抗爭再次失敗,我地一定要搞清楚自己出嚟係為乜。我地出嚟,唔係為咗要六八九落台落地獄,而係要有一個普選。就算六八九肯落台,我地都唔可以散水,因為我地係要爭取普選。要記住,唔可以將抗爭戰場當成遊樂場,快樂抗爭唔是咁做的。

三、保持意識
進攻呢家嘢,幾時都有機會發生。睇見金鐘啲人又燒嘢食又掛住開閃光燈條條揈,我不禁倒抽一口涼氣,萬一警方突然發爛渣就大件事,想唔亂都難。廿四小時都喺作戰狀態會癡線,我明,所以有時候可以輕鬆少少,但係出得嚟就一定要有抗爭嘅意識。最少,唔該盡量著T衫長褲,方便郁動,隨身亦要有至少一套作戰裝備。(即係眼罩、口罩、濕毛巾、水、乾糧、雨褸,有埋生理鹽水仲好)

四、分而不散
每個據點各有意義,例如金鐘係圍堵政府,銅記聯同金鐘癱瘓港島北岸,旺角險要可守,尖沙咀代表本土,無話邊個據點緊要啲。我要講嘅係,坐(或企)到好似金鐘咁迫,其實無好處,只會令群眾更加辛苦,令身體差少少嘅市民有機會唔舒服,何必為咗幫傳媒影張靚相而勞師動眾呢?倒不如坐開少少,保持良好通風,佔領多啲地方,遍地開花。之但係,唔可以散!每組市民之間,保持人「行able」但係車過唔到嘅距離就好夠。一好似摩西分紅海咁,就容易被攻陷。香港人做慣良民,有白車要經過,自然會讓路,無有怕。

五、堅守路障
路障係據點群眾安全嘅保障,無佢就難同警方對抗。路障嘅嘢,唔可以亂拆。試諗下,如果屋企無鐵閘,可以輕易出入,咪會有賊偷嘢囉!所以,路障一定要堅守,唔可以輕易拆除!面對雙輝一葉之流,請大家頂住,企硬!

六、安全至上
人就係最重要嘅「物資」,人身安全大過天。當警方用音波炮或開槍武力清場時,請務必按照毛主席教落嘅十六字真言「敵進我退,敵駐我擾,敵疲我打,敵退我追」,善用地形打游擊戰。保住自己有用之軀,就可以穩佔要地。而且,無人想死架嘛,係咪?

只要你支持抗爭,支持普選,渴望抗爭成功,無論你係咩人,咩派別,我相信以上六個原則都會啱用。

 

作者:南宮行