我係哩間公司打左大約三年工,同各位打工仔都一樣,每一日都為咗食lunch而煩惱,唔知你又係唔係咁…

佢地係我嘅同事,Steven同Philip,仲有差唔多日日帶飯既Terrence。四個人入面我資歷最少,Steven同Philip都senior過我,Terrence雖然post唔高,不過算係公司開國功臣。平日除咗Terrence之外,我地三個都會一齊去食lunch。公司係工業區,食得入口嘅真係一隻手數得哂。我記得最初番工個一個星期,日日都跟Steven同Philip去個間叫大富豪嘅茶記。直到第七日食完出嚟,襯佢地係門口煲煙個陣,我就問,「點解我地日日都食哩間?唔試下其他嘅?隔離街都仲有間叫浦京,好似食日本嘢」佢地兩個無答我,只係見佢地深深咁chur咗啖煙,慢慢咁呼出嚟,然後Steven話「你想試呀?聽日同你去食囉」Philip即刻整熄佢支煙頭「唔好搞我,你搵Terrence啦,聽日星期五,佢唔帶飯出黎食架」個刻我覺得我好似講錯左啲嘢,搞到Philip連煲煙都無興致咁…「都好嘅,叫Terrence都好…」

到咗第二日Steven,Terence 同我去咗浦京食lunch,Terence好似好興奮咁「做咩咁好興致去浦京?有新嘢食咩?」Terence答「無,哩位新同事想試下喎,咪陪下佢囉」「唔好意思,你唯一一日出街lunch要你陪我試食」「哦無所謂嘅,我有得食就得架啦,哈哈」咁個日我地就係浦京過咗個中午,我終於明白Philip尋日個反應咩意思,我同Steven真係反住胃咁出番黎,嘢食唔得唔駛講,服務仲好惡劣。唯獨係Terence,佢好似一臉滿足咁。Steven細細聲話「聽佢講佢老婆煮飯好難食,仲要迫佢日日帶隔夜飯,為咗星期五有得出黎食飯,聽講佢尋晚要鑑死食晒啲野等自己無飯帶」唔怪得咁難頂Terence個樣都咁鋸… 如是者,Steven陪我連續三日試咗其他幾間,原來有啲佢都從來無食過,只係Philip堅持茶記一直唔同佢去。但經過哩三日,我地都明白無陪我地癲嘅Philip,係幾咁正確。

由個日開始到而家,我地都係一直留係大富豪lunch。佢地啲伙記全部都熟晒,樓面嘅鷹哥,蓮姐,虹姑,茶水側田,大廚左輪,仲有櫃檯珊姐,真係佢地著幾號鞋我地都知。menu更加唔駛講,ABC餐唔睇都識叫,幾時有火腩飯,啫啫雞定羊腩煲都唔洗問,仲準過天文台。側田一分鐘沖幾多杯奶茶,鷹哥上凍檸茶隻手指插幾入,蓮姐每招呼一台客會噴幾多滴口水,左輪今日啲馬仔贏定輸,一食佢碟西炒飯我地就知。

如是者我番咗大半年工,已經食慣哂大富豪啲嘢,開始有種家嘅感覺,有時仲會有啲模糊,究竟我每日係為咗返工定嚟茶記食lunch…

直至到上個星期,大富豪嘅對面,開左一間叫達令港嘅鐵板餐廳。第一個開口嘅,係Steven「要唔要試下?聽日星期五喎…」Philip又竟然無反對「好丫,試下都好」於是我地又一行四人去哩間達令港試食。星期五哩間野真係好爆,從來唔需要等位嘅我地都等咗三個字,入到去係待應Wendy, Yuki, 同亞Ken,「要唔要試下今日嘅皇牌蝴蝶扒?」Terence第一個舉手,其他人就嗌咗其他鐵板餐,我就保守啲叫番西冷。上菜喇,大家都開始食,Terence直情係狼吞虎嚥,好似餓鬼上身一樣,明明佢尋晚應該幾飽架喎?「幾ok wor」我係三年黎第一次聽到Steven講哩句,而Philip…佢雖然無出聲,但我勉強見到佢眼角好似有淚光,唔知係唔係啲洋蔥汁刺眼呢?而我碟西冷,都真係唔錯,肉質同個汁都好match,有西冷味,出面食一定唔只$68.9。之後我地一連四日都去咗達令港鋸扒,Terence更唔帶飯日日都同我地一齊去,成個土豪咁一坐低問都唔問就叫皇牌餐,我地更一度擔心過佢同老婆有無事。哩幾日真係好似活係仙境一樣……直到第五日,lunch time
我地去到達令港門口,見到嘅,係一班記者同食環署「咩事呀?下?搞咩嘢?」「哩間餐廳懷疑以非法進口馬肉充當牛肉出售俾食客」我地四個聽到一個記者咁講,真係一面茫然,立即無晒食欲仲有啲反胃,我望住Terence個樣,真係好似老婆跟佬走一樣,眼入面失去咗靈魂,我諗佢哩一刻腦內個畫面只有係灰色,要Steven拉佢先走,好似電影入面俾外星人嚇傻咗一樣。

我地走番入大富豪,坐低,咩都無講,「咦?唔見你地幾日嘅?唔係過咗對面食扒嘛?」Steven即刻話「無…!公司請去旅行呀,唔記得同你地講添…哈哈…唔該寫杯熱齋啡丫…」我地即刻都跟隊點齋啡,可能大家都想重口味d洗下腸胃…「哈乜今日咁多人嗌齋啡,淨飲雙計都制」見到鷹哥上既幾杯齋啡,同清明對住死鬼老豆張相一樣,我只有後悔同懷念,同Steven數蓮姐口水花,同Philip鬥下邊個杯凍茶先上,Terence見到鷹哥隻手指插檸茶個種莫明其妙嘅興奮,哩一幕幕嘅畫面正慰藉緊我地…真係令我地唔想出去再面對個間反胃嘅餐廳,面前哩杯齋啡,雖然苦,但好溫暖,而且仲安撫住我地嘅心靈。

又過咗幾個星期,一齊歸於平靜,達令港已經收咗皮,無人再提起個幾日仙境嘅事。出奇嘅係,Terence已經唔係日日帶飯,而大富豪個menu都多咗啲新野。可能哩種就係原地踏步都好過行差踏錯,而且改變亦因而出現,$68.9可以食到西冷扒餐,諗番真係唔昆你就奇。

作者:尼爾芬