話說唔知做乜今日老豆突然叫我去廚房,話教我煲粥咁話。咁我本住話哂佢都係我老豆份上,冇所謂啦,多學當樣野。入到廚房,首先佢就話一定要跟足本食譜黎做先食得過,咁我望一望本食譜啦,九七年出版唔在講,仲要中英內容唔同既。我問老豆,通常合約之類都係話跟英文內容為準,咁我係咪照英文果度咁講黎煲?點知佢一巴車埋黎,話我冇人性忘本啦,中文唔睇睇英文。我當然唔服氣啦,我指住其中一道同佢講,有咩可能蔥花最先落先?雞粥舊雞淨係滾佢三十秒?你當佢係肥牛啊?明知唔食得落肚既我都照煲咩?

點知條友當我講嘅野冇到,一味細細聲話煲住先啦有咩再改吓囉,之後就繼續講佢所謂嘅心得。「嗱,煲粥呢,千其唔好落薯仔啊芝士依類野啊,唔啱味嘛。粥緊係配返皮蛋豬腰啦!咁先岩中國人口味,係咪先?」我望住舊黑到墨汁咁嘅皮蛋同老豆講「好心你啦,一睇舊皮蛋就知唔係好野。由外面黑到入面,終有一日食鬼死你。」佢一聽又舉起隻手想打多我一巴,今次我醒目啦,即刻搬我老母出黎。「你睇下老母先啦,中西融合既菜整到出神入化,你成日話佢整嘅野古靈精怪,轉過頭你咪又係食哂!」點知佢一聽我提老母,就啪啪啪咁打左三巴落黎「不孝子!你而家跟你老母定你老豆姓先?乜都提你老母,家下老豆就真係咁冇用咩?」我果陣心諗,你係出面係威係勢咪全靠老母儲落既私己錢同埋我自己嘅利是錢,你除左得閒賣下私煙假野搵下水魚笨你仲識乜春先?當然我知道如果我將依段說話講出嚟我係冇命出返個廚房,所以冇講出口。

最後老豆死跟自己意思跟住本錯既食譜去煮,煲粥後尾當然係唔食得啦,再加埋隻皮蛋係爛既,陣味仲臭過尿。我望住煲粥,點都鼓唔起食落肚既勇氣。老豆見我遲遲都唔食,就同我講左一句「有粥,真係唔要?」我望一望老豆同佢講,「其實我唔想食粥,我想食漢堡飽。如果你唔慣全部都係芝士同漢堡扒既話,其實你都可以用沙嗲牛肉。漢堡飽又可以集百家之大成,又好味。」佢一聽到我唔食粥,就拍哂枱咁話「我到煮到埋嚟,你唔係唔食下話?」喂大佬啊,咁煲粥真係唔食得喎,食左會死喎。咩叫食住先啊,你估打機?死左可以再黎過?我終於忍唔住拍返老豆枱「你搶我利是,我忍你;你霸我間房放你養果堆昆蟲,我都忍你。而家你連我想食咩都限住?又話比我揀,但係就比本錯到離哂譜既食譜我要我照住煮,咁叫揀咩?你食慣屎,唔代表我要陪你食屎喎大佬!」老豆聽到我咁樣頂佢法,突然面色又紅又青。見佢企左係身想用盡全身既力一巴打埋黎,但係就自己企唔穩,自己仆低仲撞埋枱角,就咁暈咗係度。我拿拿聲叫白車送佢入院,結果醫生推咗佢入深切治療部,唔知過唔過到危險期。

係醫院床邊,我捉住我老豆隻手,細細聲同佢講「老豆,其實唔係得粥一樣可以食,仲有好多更好味更多人鍾意嘅嘢食可以揀。就算你有粥比我都好,我真係要唔落。因為我想要嘢,係果個細細個成家人都好鍾意一齊去食嘅漢堡包。」


封面圖片來源:http://robow.pixnet.net/blog/post/37653081-%E8%89%87%E4%BB%94%E7%B2%A5