作為一個曾經抑鬱，近排亦經歷環境同情緒困境嘅人，我覺得呢篇文描述左一啲網上唔多見嘅症狀。
所以我用抑鬱者角度意譯咗呢篇文，再滲咗啲有用資料落去，睇有冇人有用。
21項冇乜人講嘅抑鬱症嘢
1. 好多人出於好心講嘅說話，其實係無益甚至有害嘅。
因為普通人對抑鬱症嘅了解只係建基於唔深入嘅了解，所以成日會講出：「開心啲啦
」、「唔好唔開心啦
」、 「加油去試下啦
」呢類自以為正面嘅說話，其實係完全冇撚用![[sosad]](http://i0.wp.com/forum11.hkgolden.com/faces/sosad.gif?w=900)
。
（而且當佢地發現聽完做唔到之後，仲會產生額外嘅挫敗感，或者覺得世界上了解佢嘅人，比想像中少左一個 ）
廢話安慰說話大全：http://www.buzzfeed.com/laraparker/things-you-shouldnt-say-to-someone-struggling-with-depress
2. 抑鬱，真係會產生物理上嘅痛楚
當身體真係好唔開心嘅時間，其實好多抑鬱患者會出現肌肉酸痛，關節疼痛，或者胸部刺痛（仲可能有肋側痛楚）
如果你情緒低落而又有身體痛症，應該去同醫生傾傾。
3. 對於應唔應該去搵人幫，感到好掙扎
抑鬱症令你以為嘅其中一樣嘢係：「冇人會在乎我
」，所以會出現「我都係唔好出去打攪人」呢種諗法
當呢種諗法出現嘅時候，應該在心中，大叫一聲屌佢老母梁振英
然後起飛腳踢開房門
離開呢種諗法。
你可以搵朋友幫你搵個社工，或者自己上網google下「心理輔導 油尖旺區(OR ELSE)」，選第一個社署，再選”臨床心理輔導服務”，就有哂你果區嘅中心電話，又或者直接打比諸如浸信會愛群(2436-7301)，安泰軒(3552-5420)比低基本資料同描述等佢地幫你轉介，約好時間，就會有一個同你同性別嘅朋友同你去溝通，而且用佢豐富嘅經驗，thinking tools或者set plan去幫你一路去你想去嘅方向。
而且社工ok靚仔(hehe)。
4，同食物嘅感情狀態轉咗做「一言難盡」
抑鬱會令飲食變得冇節制，不斷在「全日唔記得食嘢 」同「乜春都放哂入口
」中間搖擺。
而呢種咁差嘅飲食習慣係會在生理上，同心理上令抑鬱情況進一步惡化
所以如果暴食厭食呢個問題已經開始困擾你，你應該盡快搵醫生傾傾。
5. 有啲「朋友」會劈低你 (其實冇所謂)
有某些所謂「朋友」唔會了解你處於咩情況，所以你同佢地相處相處下，佢地會不知不覺咁潛咗水 。
其實果啲人走咗冇咩所謂，反而係留返低嘅朋友，可能會令彩虹出現
![[flowerface]](http://i0.wp.com/forum11.hkgolden.com/faces/flowerface.gif?w=900)
。
（但唔好進一步痴落佢地度，亦都唔駛開口多謝佢地，老死就係咁
）
6. 我覺得自己完全癲鳩咗，而且開始控制唔到自己
抑鬱症是一種心理障礙，叫得做心理障礙就梗係唔容易受意識控制 。
所以期間有可能會出現「一浪接一浪／持續性嘅恐慌 」「強逼性彈出黎嘅思想或者行為習慣 」「社交恐懼 」同其他有可能出現嘅一堆症狀。
記住，你唔係SHORT咗，你只係病咗，而且一定會好返嘅。
7. 一切事物都會變得好煩，包括你自己本人
煩躁係抑鬱症嘅症狀，而且佢極容易比人忽略 （你只會覺得「我原來係有火嘅人」，而忽略咗自己正在變得暴燥 ）。
脾氣暴躁其實係病程中嘅一部分，過咗去嘅你不應該再感到好內疚 會令自己困在過去。
如果仲有機會嘅，好好對返曾經傷害嘅人，補償返。
8. 日日做慣嘅嘢突然「唔知做乜Q嘢」
日日沖開嘅麥皮點解好似咁多步驟咁撚煩
點解JEL個頭成日唔啱心水連風筒都掟鳩爛埋
飛件衫去洗衣機屌佢老味落咗垃圾桶
一個風雷電飛過去踢鳩埋個垃圾桶
… ziiii好痛….
生活變得愈黎愈煩…
深呼吸，然後上討論區POST瘋狂打字
有用的（我梗係唔會話你知我咁做過）。
9. 冇咩可能話到比人知「你幾時講嘅係發病說話，幾時講嘅係正常說話」
抑鬱病人想在腦入面果堆狗屎垃圾入面搵返僅有果啲「健康又理性嘅思考結果」，同在高登搵個好似我咁嘅清泉會員出黎一樣 ，係好撚難，近乎冇可能。
但如果你可以慢慢sort out到同知道邊啲係狗屎，邊啲係理智嘅話，你在好返嘅路上已經走出咗巨大嘅一步。
（我在最低潮嘅時候，曾經寫過少少獨白，入面有一段：「在我心中，有一池黑水。我心中的想法比人多，口裡的說話卻比人少。有時是想不說話，有時是說話到了嘴邊，發出了第一個音節，才發現自己心裡沒有一句組織好的句子，有的只有說不出的感覺。」，希望你地明白抑鬱者嘅腦入面，好多時的而且確只有狗屎，有用嘅嘢佢自己都唔知塞咗去邊。）
10. 抑鬱症會嚴重咁破壞你嘅睡眠時間表。
想訓嘅時間就訓唔到 唔想訓果陣就比人扑濕咗咁失去知覺五個鐘。
係啊我知我講緊你。
11，抑鬱症可以令你感覺唔到任何情感
如果我話一個人抑鬱，你梗係會假定佢心入面應該係「好SAD，好UPSET 」
但抑鬱症都可以令患者感到麻木（應SAD時不SAD，應笑時不笑，就算開心都係一瞬即逝，但唔開心嘅嘢就一直長留），或感到「情感上嘅筋疲力盡（ emotionally exhausted）」
無論人地點講，呢個的確係抑鬱症。如果你覺得情緒麻木或一片空白，你應該向醫生或治療師求助。
12. 「好……..撚…….悶……….啊」
幻想一下，你被人用槍指住個頭，逼你睇一套家燕姐做主角嘅粵語殘片，一集做24小時，12集為一季，總共出到第80季
你對套嘢嘅人物設定冇興趣，對住嘅劇情走向冇興趣，對家燕姐頭上粒墨嘅膚質有冇緊致咗就更加冇興趣
當你抑鬱嘅時候，你嘅生命就好似被逼睇呢套粵語殘片咁。
試下用任何嘢分散你注意力一段時間，佢會令你專注返同冇咁悶（暫時性地）。
↑其實最尾呢句原文係廢話，分散到鬼唔想分散。計我話第一要搵人講，第二要真正問自己個心有咩想做，當你生命路上有返任何一點光，就有動力，然後有希望。
13，一直感到內疚。
有咩嘢慘過精神抑鬱，情緒低落？
答案唔係食兩舊屎，唔係守門員
答案係：因為一啲控制唔到嘅嘢（uncontrollable disorder），造成咗令人唔高興嘅後果。跟住覺得自己自私撚失敗撚仆街仔
呢啲都係常見嘅抑鬱症觀點，而且係錯嘅觀點。
認知行為療法可以幫你識別返抑鬱想法同情緒（例如內疚）出黎，再用思維工具去克服佢地。
14. 世界上有好多人仲慘，唔代表我就開心到
係啊有人飢荒緊 係啊有人生意失敗 屋企煤氣爆冚家剷 條女仲大咗肚。
但呢啲嘢唔會令我冇咁唔舒服。
其他人有問題，唔代表我個問題就會消失。
15. 做咩啲夢咁畸怪?
有研究表示，抑鬱患者發夢嘅內容同質素，會隨住佢地嘅抑鬱症階段出現波動。
16. 差啲想打爆塊鏡
自卑都係抑鬱症嘅症狀之一，有時患者會透過塊鏡，見到自己個樣有幾差，或者提醒自己係邊個唔討喜嘅人。
有時，蓋埋塊鏡幾日都係好嘅做法。
17. 抑鬱症病人睇落有佢自己一套”邏輯”
有研究表明，抑鬱的人有一個不同常人但非常真實嘅世界觀，然後抑鬱思維就可以靜靜雞植入其中，例如堅信「我係個仆街仔／個世界冇晒希望／我存在根本就冇意義」作為一個不容置疑嘅事實。
呢啲梗係思維死角，同社工傾傾可以幫你抑鬱症可以點樣用佢嘅”邏輯”嚟FAKE你。
18. 抑鬱，可以令你真心咁同人嘈：「我係幾咁衰我最清楚，你唔駛試圖說服我」
「我覺得你冇問題，真係已經做得好好 」
「唔係 完全唔係，我其實係世界上排頭幾名嘅衰人 」
19. 如果你鬱咗一段時間，重新進入社會的確係會尷尬嘅，但唔驚
只要堅持多一段時間，你就會開始覺得身邊嘅人同事，已經變得開始ＯＫ，感覺唔錯。
所以慢慢黎，唔駛急，不知不覺間你又會融返入身邊嘅人同世界裡面。
20. 你未必能清楚咁規劃將來
抑鬱唔單止可以一直令你覺得世上冇哂希望，令你世界變成黑媽媽一片。
佢仲可以在某些好想法出現嘅時候，自我否定咗佢，等你覺得個世界真係黑媽媽。
如果你覺得世界冇希望，或者個腦不斷同你自我否定啲 IDEA，請搵社工或者你最好嘅朋友傾，佢地會話你知邊度有問題，甚至直接落手帶你上條啱嘅路上。
20.5:
呢個世界上，冇人會完完全全咁明白你，就連你自己未到七老八十都未必認得清自己。
所以無需陷入想同人解釋又解釋唔到嘅旋渦，亦唔駛痛苦點解冇人明白自己。
成日同朋友傾計，生命中做好自己，努力做想做嘅事，錫住錫你嘅人同你想錫嘅人，然後唔解釋太多。
21. 抑鬱症會令你覺得自己係一個人。
其實你唔係。
本文只應作為參考資料，如有身體不適請儘速求醫
來源：http://www.buzzfeed.com/alexisnedd/things-nobody-tells-you-about-being-depressed
翻譯：健康的人(蒙譯者答允轉載)