Warning : 劇透

相信好多人都睇過Quentin Tarantino果套Pulp Fiction,咁唔知大家記唔記得電影前段,Jules同Vincent去一個住宅單位道攞翻一個公事包?果個好似我地打開存摺咁,一打開就有陣光嘅公事包?

好明顯個個都知成套戲入面,係冇講過公事包入面裝乜嘅。咁呢,小弟就綜合咗幾個有趣嘅理論,想分享下。

 
– – – – DRUM ROLL ! ! ! – – – –

 

 

公事包入面裝住黑人大佬Marsellus嘅靈魂。

我地第一次見倒個公事包果陣,Vincent負責檢查入面嘅野,佢打開個盒果陣,個密碼係666。大家都知666代表乜啦,咁我就稱呢個公事包為「惡魔的公事包」

去到下一段,黑人大佬Marsellus同拳手Butch約定打假拳果陣,由於大佬背向觀眾,觀眾只睇倒佢嘅後腦,同埋後頸上嘅膠布。咁啱,相傳一個人出賣自己嘅靈魂比惡魔果陣,惡魔會係佢頭後面攞個靈魂出黎!!

最後,Jules同Vincent槍殺左個幾個後生仔之後,有個殘黨係廁所衝出黎,「Die you motherfu…」,不斷射佢地。果幾槍係近距離發射,但係一槍都沒中,Jules同Vincent就射返個殘黨。呢度當然可以解釋為屎忽撞棍死好好彩,但亦可以係Jules同Vincent拯救緊一個靈魂,上帝就伸出上帝之手救左佢地一命!(加上後來Vincent串Jules「You think god came down from heaven and stopped the bullet? 」,各位請自行判斷兩者有何關係)

最後,惡魔覺得自己比人過左橦,愈諗愈唔抵啦喎,咪設計害佢地囉。首先係Vincent把槍冇啦啦走火,日光日白打爆左後坐黑人青年個頭,然後Jules同Vincent食早餐撞正有人打劫,Vincent比Butch射死,重有Marsellus比人插……..都可以理解為惡魔嘅安排嘅。

當然啦,以上咁多好大機會係觀眾諗多左,但發掘下電影背後嘅趣聞,都幾好玩㗎!

作者Supernova