是咁的,我同女友打算下年結婚,酒席果啲我哋暗地裡已經plan好曬、落埋訂,琴晚就同女友屋企人食咗餐飯諗住傾禮金。

 

「世伯、伯母,我哋諗住下年年底結婚。」

 

伯母一聽到,笑到四萬咁口:「好呀!我啲世侄都結得七七八八,你哋早就應該拉埋天窗啦,哈哈!」

 

「哈哈,咁禮金方面,你覺得跟返公價有冇問題?」

 

伯母:「公價三萬八係咪?」

 

「咩話?三萬八?我諗住三千八咋喎!」

 

話口未完,伯母面色一沉,成枱靜到落針可聞。

 

半晌,伯母終於出聲:「阿波,你一開始應承咗話會同阿女結婚,我先畀你哋行埋。點知拖下又一年,拖下又一年,你話要準備又循序漸進又儲錢又盛,足足拖咗十七年,十七年你就係儲咗三千八?」

 

你老味呀!狗眼看人低!三萬八我唔係冇,呢幾年我都算撈得唔錯,一年加8%人工,但如果你又問我攞三萬八、地鐵又話加我價、樓下管理處又話要攞我幾千,咁仲得了嘅?最緊要係我哋酒席book左半島成個hall,即場拆埋人情都係僅僅夠埋單咋!八婆!

 

「伯母,講下道理好喎!你而家又唔係賣女,禮金呢家嘢,有咪得囉!三千八你脆脆地『袋住先啦』!」

 

「而家唔係話要賺你,但你哋結婚,我哋女家起碼都要打對龍鳳鐲,三千八邊夠?你頭先自己都識講有公價,公價平極都三萬八,先岩岩夠打金。」

 

「嗱,伯母你聽住,據我所知,我識嘅朋友入面數埋都係得兩個禮金係畀三萬八,咁三萬八要點會係公價呢?」

 

我冇講大話,實情係,佢哋多數都唔止三萬八,有啲仲畀十萬八、廿萬八添!

 

伯母聽完嬲到震,發難話:「總之冇三萬八就冇得傾!」

 

見我哋劍拔弩張,女友就諗住打圓場:「大家一家人有商有量,點解要企到咁硬呢?三千八同三萬八之間其實仲有好多走盞嘅空間,例如三千八百零一,係咪又值得傾下呢?」

 

「好啦,我提供多個方案:一係三千八港紙,一係三萬八千Yen!」

 

豈料伯母竟然拍枱大叫:「仆街打靶仔!你耍鳩我呀?」

 

「嘩乜你講粗口咁暴力!而家有得你揀你仲想點?有禮金,你真係唔要?其實大不了我咪唔結,伯母你好好諗清楚,我係你就『把握機會,實現嫁女』喇!」

 

講到呢度,由頭到尾一言不發嘅世伯終於開口:「你哋好嘈好煩呀,三千八又好,三萬八又好,咪一樣,關我咩事?是但啦,冇所謂!」