大家仲記唔記得件事啱啱開始曝光時, M記一副關我叉事的態度嗎?

矢口否認, 話公司重視食品安全, 所提供嘅食物都嚴格遵守有關法例既安全標準云云。 個副咀臉大家應該好熟悉,正正同我地嘅現屆政府同立法會一模一樣。

有冇諗過點解會變成咁? 其中一個主因, 就係普羅大眾經常性地集體失憶兼且鐘意自欺欺人(冇事嘅/食唔死人嘅/有政府睇住嘅…等等), 令到政府同大財團可以拖得就拖, 等風聲冇咁緊, 過左海就神仙。

呢啲事發生完一次又一次, 唔知點解啲人硬係唔肯學精。結果就鍊成咗依家呢d啲咁厚面皮嘅現屆政府同立法會, 啲大財團即刻有樣學樣。

可能有人會話, 知道又點? 唔失憶, 唔呃自己又可以點? 我會對佢地講: 睇下M記, 今鋪最終都係要向市民嘅罷買行動跪低。 冇人發動過任何行動, 係大家自己有默契地齊齊唔去食。 我仲記得禮拜日屋企樓下嘅屋邨M記得返一半人都唔到, 就連平時一定坐爆嘅銅鑼灣分店都空盪盪, 個種壓力係好實在, 同埋好有即時性, 令到大財團無法子唔去面對, 最終要向大家道歉同承諾唔再用福喜啲過期嘢。

所以, 香港人咪再妄自菲薄啦。一個人嘅力量有限,但係當大家行動一致嘅時候, 係的而且確可以改變到件事㗎! 今次就係一個好好嘅例子。 題外話, 今次政府(食物環境衛生處)做得好好, 要讚。 不過呢, 如果今次出事嘅唔係美資嘅M記, 而係有紅色背景嘅集團, 又會唔會有一樣嘅做法呢? 相信大家咁醒目一定心裡有數。 如果唔鐘意咁樣, 就要謹記今次件事帶黎嘅啟示, 為香港未來齊齊行動啦。當大家抱住相同嘅訴求齊齊出現係中環嘅時候, 個政府就好似M記咁, 係冇辦法當睇唔到㗎。

作者:退密齋