問:政府而家做緊乜?
答:政府而家正喺度用盡方法擦大陸鞋,例如放寬大陸人嚟香港嘅限制、成千億起高鐵、深港機鐵等等。

[hr]

問:有乜問題?
答:大陸同香港嘅地理同政治邊界愈嚟愈模糊,如果繼續落去,香港人將要同十三億人競爭。

[hr]

問:香港人唔係好有競爭力咩?怕咩競爭?
答:香港人有兩種優勢,一係英文優勢,二係制度優勢。香港人英文愈嚟愈差,大陸人英文愈嚟愈好,所以香港人嘅英文優勢就嚟消失。咩叫制度優勢?香港嘅制度優勢係自由同獨立、公正嘅法律。而家政府拼命想同大陸融合 (或者大陸拼命想香港同大陸融合),傳媒被統戰 (例如某報編輯改標題、電視台不太敢報導大陸/ 政府嘅壞處等等),言論自由正在萎縮;大陸白皮書一出,提倡「全面管治權」、法官要「愛國」 (其實係愛黨,唔係愛國),香港嘅法律同政治制度勢將破敗。

[hr]

問:冇獨立公正嘅法律制度、冇自由,有乜問題?
答:冇獨立公正嘅法律制度,即係代表政府/ 有影響力嘅人可以濫用公權力 (即係法律),例如政府要拆你間屋,你唔肯,你上街抗議,政府就可以用不公正嘅法律制度嚟起訴你、拖住你嘅生活同工作,咁你就有冤無路訴,惟有畀政府拆你間屋;如果你係商人,你嘅拍檔違約,你想告佢,但礙於你嘅拍檔有政府/ 大陸背景,你告唔入,點解?因為法官/ 政府會拖你,拖到你唔夠錢畀律師費,等你決定唔告對方。
冇自由,就代表資訊唔流通 (例如政府講啲唔講啲),如果你係商人,你會唔會投資一個資訊唔流通、政府隨時可以用公權力抄你家嘅地方?

[hr]

問:法律不公正、冇人投資,咁香港會點?
答:香港一直以嚟都靠金融揾食,法律不公正、不獨立,資訊不流通,就冇人/ 只有好少人嚟香港投資。一旦金融玩完,香港都會玩完。

[hr]

問:唔玩金融,可以玩第二樣啩?
答:香港除咗金融之外,其他產業 (例如高科技、工業、農業、文藝等) 都係極之衰弱,而且要發展其他產業,都唔係一朝一夕嘅事,香港人可以等幾耐?就算香港可以喺短期內發展其他產業,但都要同大陸競爭、鬥平,你認為香港會夠大陸爭咩?

[hr]

問:唔係喎,香港人冇咁差架喎。
答:就算香港人個個都係「周身刀,張張利」,個個都係「萬能俠」,但當香港失去優勢,同其他大陸城市一樣嘅時候,香港人嘅對手係十三億!如果十三億入面最叻嘅百分之一人係精英,而呢批精英入面有十分一嚟香港,咁香港人就要同一百三十萬精英競爭!面對十三億人嘅精英中嘅精英,你敢講你爭得贏佢哋?就算你好勁,能力可以同呢啲精英並駕齊驅,但你要月薪兩萬,人哋要一萬,請問你點爭?

[hr]

問:唔係喎,大陸冇理由想整衰香港架喎。
答:你話大陸唔會整衰香港,咁你應該先問「當香港同其他大陸城市一樣嘅時候,點解大陸仲要益香港」。

[hr]

問:政府跟大陸嗰套又點?大陸嗰套制度唔好咩?
答:大陸聲稱有良好監管制度,事實呢?事實係貪官污吏猖獗,一個小官可以貪數億巨款、包三四五六七八奶、買十幾層樓,人民有冤無路訴,投訴、上訪、被逼遷等等冇人理,所以先至有人自焚、飲毒藥、放炸彈。身為香港人嘅你,係咪想香港變成咁?

[hr]

問:貪污有咩問題?
答:如果你上司貪污,你又想升職,咁你就要送禮、送車、送樓,請問月薪不過幾萬蚊嘅你,有幾多錢可以送畀貪官?香港人比大陸人有錢得多,喺貪官眼中係塊又大又好味嘅肥豬肉,如果你係香港人,你甘心自己嘅血汗錢流入貪官污吏手中咩?

[hr]

問:點先可以保障香港人第日揾到食、繼續賺大錢?
答:民主政制可以保障香港人嘅利益。例如政府想開放大陸人嚟工作,香港人可以拒絕。如果政府一意孤行,破壞香港人嘅利益,香港人就可以用選票趕政府/ 領導人落台。但而家香港人冇選票,無論香港人有幾不滿,都只能在街上疾呼,唔可以用有效嘅手段趕政府落台。

[hr]

問:有選票又點?政府咁易畀你趕落台咩?
答:而家香港人冇選票,所以政府/ 官員做咗啲破壞港人利益嘅嘢/ 犯法嘢,香港人都唔可以趕佢哋落台,而佢哋就可以繼續破壞港人利益/ 逍遙法外。如果香港人有「一人一票,公民提名」,官員、政府就會因為怕唔夠選票,所以戰戰競競,小心翼翼,唔敢破壞香港人嘅利益。

[hr]

問:而家政府唔係講咗一人一票咩?
答:只有「一人一票」係冇用嘅。而家政府/ 大陸嘅方案係玩篩選,即係佢揀兩個傀儡畀你,叫你是但揀一個,重點係無論香港人點揀,揀出嚟嘅都係傀儡,只會死跟大陸旨意,唔會以香港人利益為首。香港人要嘅係「一人一票,公民提名」,只有公民提名,香港人先有選擇,起碼特首候選人唔會只得傀儡,起碼有真心為香港人嘅候選人入閘。

[hr]

問:我想保障香港人嘅未來,有咩可以做?
答:一、廣傳呢篇文;二、說服家人、朋友,同佢哋講民主有幾咁重要。

[hr]

額外問題:佔中搞緊乜?
答:佔中係要爭取公民提名,正如上述,只有公民提名先可以保障香港人利益。

[hr]

額外問題:佔中會搞亂香港喎。
答:佔中係會令社會短暫癱瘓,但為咗香港嘅將來、為咗香港人幾十年後嘅利益、為咗香港唔好變成大陸咁,呢啲短暫嘅代價值得付出。

 

作者:Harry Lee