「六二二公投」於今日正式展開,喺中國曲線推動下,投票人數喺五個鐘內已突破二十萬人,或會超越2010年民主黨杯葛嘅五區公投嘅五十八萬人。然而,有如此龐大嘅民意基礎,香港人更要提防畀賣港政黨利用,並再一次向共匪投誠。

仔睇細今次投票嘅題目,唔難發現其弊病。第一條問題顯示「和平佔中」只會將獲選嘅方案提交予政府,而非將佢視為唯一支持嘅方案。發起人戴耀廷亦曾表示,「和平佔中」會將政府提出嘅方案同獲選方案再一次畀參與者投票。如是可見,「和平佔中」根本唔可以訂出一條確實嘅底線。

再睇第二條題目,「如果政府方案不符國際標準讓選民有真正選擇,立法會應否否決?」先唔講立法會議員遵從投票決定嘅可能,「和平佔中」一直冇為國際標準提供一個確實嘅定義,其範圍甚至可以話係肥婆底褲咁闊。即使係十八學者、香港2020等等近乎建制嘅方案,亦成為五月商討日嘅候選方案。「和平佔中」嘅底線既然可以移動,所謂嘅國際標準又如此模糊,若港共政權提出一個近乎學者意見嘅方案,係咪代表賣港政黨可以放棄佔中方案,轉為支持假普選方案呢?

近日陳雲教授提出應杯葛「六二二」,正係警告香港人,賣港嘅政黨正準備利用「和平佔中」嘅退縮同漏洞,驅劫民意,出賣選民。但係,「六二二」既已近乎成功,並構成民意基礎,呢個陷阱只能防備,再唔能夠移除。因此,香港人更要打醒十二分精神,喺假普選方案再一次通過前,盡一切方法將偽民主派踢走! (社會上已提出各種方法,此文唔再細述,亦希望香港人可以集思廣益)

參考:
陳雲facebok:
https://www.facebook.com/wan.chin.75/posts/10152439725397225

作者:唔怪得之