要分析香港風水, 其實有好多方面可以講。我試下從三方面入手:龍脈穴位、香港立極點的巒頭同玄空理氣上出發。之前有文講過大蛇纏鳳凰同靈龜唔點講啦。

1. 龍脈穴位 :FS 1
中國龍脈由崑崙山起,一直向東及南下,走到好遠黎到香港沿海地方盡頭結穴,香港呢種穴位叫「回龍顧祖」。 我來解釋一下咩係回龍顧祖。 一般穴位都背靠大山而面向水的,但回龍顧祖穴卻岩岩相反,呢種穴位通常會出現係山脈盡頭, 而面向番個山脈。咁呢種穴位有咩好?通常正正常常穴背山面水,有靠山守護。但回龍顧祖穴靠山就細好多,佢個好處係,佢岩岩回番轉對住山脈,因水向低流關係, 回龍顧祖穴一般會得到兜住好大量由祖山脈流出黎的水,香港呢個穴就兜住左由珠江再入維港d水,意象就係成日有個大水喉射住香港, 想唔發都幾難啦。

2. 立極點的巒頭:
要細緻啲分析香港,就要有個立極點。香港最繁盛之地就係中環,而中環都係香港呢個回龍顧祖穴位所在。由中環睇過去,先有維港一浸水,再睇到獅子山。呢個大巒頭,風水上有個理論係「呼形喝象」, 個原理就係話用個件野個外形似咩野就幻化成現實上某事。獅子山外形似獅子,所以解作好有力而兇猛之物,咁隻獅子個頭好在唔係向番中環,而係向住左面。首先要解釋嘅係,風水學好着重個意思,咁個獅子應該係兇猛之物, 會咬人架。咁點解對香港有利呢?其實最緊要係隻獅子唔係向住中環, 如果向住中環咁即係咬自己,咁就大獲。而佢係面向另一面,好似中環指揮住佢咬人咁:哇,有隻獅子咁嘅手下喎,  仲唔勁過superman咩!中環外的維港就好似自己手上ge錢咁,流出流入,錢更係有入有出,汲水門同鯉魚門水口都有島仔守住,意象為有人幫手睇香港銀包。

拿講左咁多好野,咁有咩唔好先。 一,個維港由開埠到依加成日填,港口窄左,咁容納嘅水就少左,咁好似個銀包縮左水咁,仲邊有得發圍。二,維港岸邊本彎彎曲曲,咁水流就緩慢左,令香港更聚到水,但填海令到維港海岸線更平, 咁水流更急,攪到香港聚唔到水。其中一個例子就係,零八至零九年間金融海嘯,最傷有幾間野,匯豐、AIA、 中信泰富。呢幾間野嘅辦公大樓都不約而同地喺中環,亦岩岩前面就中環維港填海工程,一來動土,動破佢地財星,二來個工程令佢地出面本來有個粒位的維港填平左,咁佢地聚唔到水。而家睇番下,呢幾間野仲未番到08年之前咁。

3.  玄空理氣:
點解香港會喺七,八年代起發呢?用玄空飛星解釋一下。以中環為立極點,中環好多商廈都係七八九十年代起, 個時係六運(1964-1983), 七運(1984-2003), 而多數樓都向維港,即坐南向北,咁即坐丁向癸或坐午向子,起出黎個玄空盤一樣,以上係好大概咁講,當然唔係每座樓座向一樣,我只係指較多的,以玄空飛星起盤如下:
FS 2

FS 3

由以上兩個盤睇到,無論六運,或七運盤去到七運時個7仔(圖中在北方紅色的7字)都見水,即維港水,對中環黎講, 香港喺佢北方,旺運加上有維港水催旺, 七八九十年代係香港最當旺時期, 但到八運即2004年後開始走下坡, 呢個係整體走勢分析, 不包含特別年分劫數, 如97, 03, 09年等, 之後再分析。

97,  03, 09年大家發唔發覺有咩共通點, 其實呢幾年都係丑未年, 即羊年或牛年, 點解牛羊年都有唔好事呢, 其實香港中環主要向北方, 對北方黎講, 南面火位都係佢三殺 即巳(蛇) 午(馬) 未(羊) 年都犯三殺,所以蛇馬羊年一向都麻麻地, 不過多數羊年爆獲je,  子丑年係屬水(北方),  中環都向北, 犯到太歲, 所以好多時鼠牛年都好差,例如2001-2003經濟差, 2008-2009金融海嘯啦, 2013及今年政局都好動蕩啦, 不過仲未爆獲住, 明年先羊年, 乙未年就爆啦, 犯正三殺。

由以上三方面睇香港好快有大獲野, 同不斷走下坡, 不過都有解救法, 不過要好大型先得, 就係重建過d樓, 特別係中環個d樓, 張佢地換過新運, 因八九運坐丁向癸都係旺向,咁到在九運後, 即2024年後香港會再次復興。

最後戴個頭盔先, 呢d係馬後炮分析, 有錯請各路師兄指正。

最長大奔走 (5669)