做咩啫你地?何俊仁議員不過係響工作時間上網睇下J圖,你地就係度抽水,我覺得真係好過份囉!豈有此理!

曾俊華個份垃圾預算案,根本毫無驚喜,對白年年如是,都係個啲外圍經濟波動呀、量入為出呀、未雨綢繆個啲廢話,仁哥為避免聽聽下忍唔住,好似個位話李慧玲係小爬蟲既黃定光咁公然係議事堂訓覺,又唔想好似個位霸住冬奧參賽團席位個位二世祖缺席會議,咁梗係要搵啲野提下神架啦!要令自己保持清醒,首先要促進一下血液循環,要促進血液循環,就要先將全身血液集中於一處,仁哥呢一招,充份反應佢對人體生理構造係幾咁熟悉。

再講,你班粉腸係度笑仁哥蠢,話明知佢個位對上就係記者席,一舉一動都比人睇哂,竟然仲敢係預算案公佈呢啲時候睇J圖?

你地咪玩啦,仁哥係尊貴既立法會議員,一個月拎緊八萬人工,係八萬呀!拎咁多人工既人點可能係蠢?最多係投票比佢既人蠢啫!

計我話,仁哥根本係做緊一場個人抗爭,一場和平、理性、非暴力、非粗口(但有啲色情)既抗爭!

你地睇唔睇到,仁哥睇緊既女,多數係大陸妹?反映出仁哥係一個幾咁熱愛祖國既大中華撚!佢一邊為東莞流離失所既女同胞默哀,一邊用隻肥大既手指係部iPad度掃呀掃,根本就係抗議緊中共政府粗暴對待性工作者!

其次,仁哥係明知會比記者影低再大造文章,然後又會比好事之徒如筆者抽水抽返個零兩個禮拜既情況下,仍然勇敢打開J圖,呢一個動作象徵住男權運動既反擊!香港男人比港女們欺壓得太久,長期以黎睇AV都要偷偷摸摸,今日仁哥身體力行咁話比廣大港男聽,我地係時候要站起來!我地要勇敢承認自己係個淫賤既真男人!我地如果係呢個時候都唔出黎挺仁哥,我地同個啲唔出黎抗爭既港豬有咩分別?

再者,我懷疑仁哥係為佔中做緊準備,須知道佔中係持續既運動(好似係) ,漫漫長夜,寂寞難耐,唔通真係對住卿姐個樣黎……所以,趁而家得閒,儲定啲糧,都差唔多架啦,由此得知之前民主黨佔中宣誓,係講堅架啦。

水抽住咁多先!仁哥,我支持你!