Canossa-three (1)
上集講到962年第一位神聖羅馬帝國皇帝奧圖一世頒布左<奧托特權>確認教皇國係教宗私產但又要教宗同時效忠於神聖羅馬帝國皇帝。
教廷完全成為左神聖羅馬帝國分封既諸侯,當時既教宗利奧八世意識到長此落去教廷必成神聖羅馬帝國皇帝既傀儡,咁佢就向拜占庭求救啦。
但點解係拜占庭?因為當時天主教世界最大既頭唔係羅馬教宗,係君士坦丁牧首,理論上。
但係阿爾卑斯山外既神聖羅馬皇帝奧圖一世收到消息利奧八世倒向拜占庭既時候就即刻出兵羅馬殺左利奧八世再立若望十三世為新教宗。
就咁羅馬教廷就好成功咁成為左神聖羅馬帝國既傀儡啦。

係民族大遷徙之後呢班日耳曼山番推翻左先進文明既羅馬帝國接收左一大遍既土地同人民。
但係入侵羅馬之前佢地只係班食飽就訓既馬騮。
佢地要點管理自己既王國呢?
破敗既基建,落後既行政管理,國王又要征戰各地居無定所,龐大既王國只會成為負擔。

呢個時候國王就會將某D土地賜比有功既軍人,佢地可以得到呢片土地既利益,土地入面既人耕田又好開礦又好賺到既錢都係地主既。
另一方面為抵制隨時而黎既外敵,國王又會分封親信到邊境特許興建城堡。
軍事既問題就解決左啦,行政呢?
如果純粹只係將土地分封比諸侯起城堡既咁只係引火自焚。
規範人民同貴族既法律條文同確保佢地效忠自己既政令呢?
而呢班山番又不屑於讀書識字咁呢D文書工作要比邊個做呢。
最後佢地就要搵班全歐洲唯一識字既人黎幫手管理國家啦,呢班人就係教士。
就咁各封建領主為培養自己所需並信任既教士就紛紛係自己既領土建立起修院然後再用錢為自己既親信買入面既職位。
呢D就叫販賣聖職。
從此世俗既利益就進入左教會內部,亦因此有別於東方既拜占庭,西方既教會進入中世紀後急速腐化成為嫖賭飲吹之地。

1032年本篤九世就任新教宗。
佢之所以坐得上呢個位唔係因為佢係教會內有咩出色既表現相反而係貪佢易控制。
佢點解易控制?因為佢後生。佢有幾後生?11歲。
神聖羅馬帝國為左控制教廷已經去到呢個地步啦。
當時教會內部分成兩大派,一邊係依然忠於自己職務侍奉上帝既教士,另一邊就係靠世俗君主販賣聖職買入去保護佢地利益既教士。
到1036年前者趕走左代表世俗腐敗傀儡既本篤九世捧左個改革派既教宗西爾維斯特三世出黎。
但坐左兩個月都冇神聖羅馬皇帝康拉德二世又出兵抬返本篤九世返去。
但又到左1044年身為教宗既佢突然色心起想結婚喎,咁佢就用650公斤黃金賣佢個位比佢契爺聖若望教堂首席司鐸成為教宗額我略六世。
但額我略六世坐上左教宗個位西爾維斯特三世又返黎想同佢爭。
最後神聖羅馬皇帝海因里希三世收晒佢地兩個皮抬左克萊孟二世出黎做教宗。
1047年克萊孟二世死後本篤九世又返返黎坐埋佢第三次任期既教宗。
1048年本篤九世死後達馬蘇斯二世繼任教宗但因為神聖羅馬皇帝海因里希三世睇佢唔順眼做左廿八日就比人毒殺左。
呢個就係中世紀既羅馬教廷。

即使亂成咁都不斷有人撲上教宗寶座,下一個教宗就係利奧八世。
除左教會內部既權鬥,當時羅馬教廷仲面對住同東方教會係教義同儀式上既分歧。
羅馬教宗認為我個位係從耶穌經伯多祿傳落黎既所以你要聽我。
而拜占庭既君士坦丁牧首就認為羅馬帝國首都既主教先係最大,而教會已經係當年跟君士坦丁帝搬左黎君士坦丁堡所以應該要你聽我。
乜野搬左啊!?我個羅馬帝國仲係到!!你個羅馬帝國先係假既!!
為解決分歧1054年利奧八世就派左個親信宏伯特去拜占庭同君士坦丁牧首理論啦。
臨走前利奧八世仲比左封破門詔書佢以防萬一。
點知宏伯特去到君士坦丁堡冇耐就傳黎利奧八世既死訊,而家佢就成為左東西教會談判既全權代表。
7月14日宏伯特攞住破門詔書衝入聖索非亞大教堂"你地呢班異端!!你地已經被逐出教會啦!!等落地獄啦!!"
從此天主教就分裂為東方正教會同西方公教會,而係羅馬既西方教廷冇左拜占庭撐腰就要獨力對抗神聖羅馬帝國啦。

係利奧八世死後繼位既係尼各老二世。
係之前所謂教宗不過係羅馬城既大主教,教宗係由羅馬城居民投票產生。
但自從奧圖一世發現干預教廷係好好玩既事之後每馮教宗選舉神聖羅馬帝國皇帝都會操隊兵入羅馬"參觀選舉"
而家仲要冇埋拜占庭撐腰教廷既獨立更係岌岌可危。
不過天賜良機比尼各老二世,佢係1059年繼任教宗時既神聖羅馬帝國皇帝係只有九歲既海因里希四世,佢連自己屋企都管唔掂,如果教廷有咩要搞就趁而家啦。
尼各老二世發表<以主之名>既教宗詔令教宗要由樞機主教選舉產生,咁樣至少教宗個位可以擺脫世俗君主既操縱。
1061年尼各老二世過身,羅馬聖伯多祿鎖鏈聖殿舉行第一次樞機主教選舉既教宗。
佢條橋行唔行得通就睇呢次。

10月1日夜晚,一個改革派既盧卡主教安塞爾莫宣佈當選為新任教宗亞歷山大二世。
班靠販賣聖職成為教士既"酒肉和尚"當然不滿啦但神聖羅馬帝國皇帝又咁既環境可以點呢?
咁佢地就搵左海因里希四世既啊媽攝政太后普瓦圖的阿格尼絲申冤啦。
阿格尼絲就聯合埋班酒肉和尚指責教宗選舉非法然後捧左個何諾二世出黎話佢先係合法既教宗,得到阿格尼絲支持何諾二世就帶住神聖羅馬帝國既軍隊操返去羅馬趕走左亞歷山大二世。
被趕走既亞歷山大二世佢又自己吹左隊雞南義大利諾曼人黎撐腰。
就係兩隊人馬齊集羅馬準備開片時神聖羅馬帝國竟然發生政變,科隆大主教安諾二世趕走阿格尼絲成為新攝政。
係安諾二世斡旋下兩派人馬召開曼圖阿宗教會議承認亞歷山大二世先係合法教宗。

1070年海因里希四世成年趕走埋攝政科隆大主教安諾二世成為大權在扼既神聖羅馬帝國皇帝。
1073年亞歷山大二世過身額我略七世當選新任教宗,呢年海因里希四世廿三歲。
佢兩個將要為呢一百年黎教權皇權鬥爭一決高下。

而家確立左樞機選舉令教宗擺脫世俗君主既操縱,下一步要解決既就係靠販賣聖職而被世俗君主操縱既教士。
1075年額我略七世發表<1075年教宗訓令>宣佈教會係上帝經耶穌獨自建立既自耶穌繼承落黎既教宗係世俗唯一既普世權力有權任何教會職務。
咁橋當時米蘭主教啱啱過身海因里希四世就希望放自己個專職司鐸去接任,但額我略七世搶先放左個自己既親信落去然後恐嚇海因里希四世:如果你夠膽同我爭既你保證會被絕罰。
就咁海因里希四世就係沃爾姆斯召集起神聖羅馬帝國各地既主教,係呢場集會入面海因里希四世當住神聖羅馬帝國各地既主教面前不斷慷慨激昂地數臭額我略七世,並要求主教支持佢廢黜額我略七世。
大家聽完就只有你眼望我眼。
冇耐大家就收到額我略七世對海因里希四世處以絕罰既消息。

咩係絕罰?絕罰姐係你已經唔係天主教徒。
失去左教徒既資格唔只代表你會落地獄,更重要係現世上你作為皇帝你管治國家既權柄係黎自教宗既授權,作為西方君主被絕罰更代表你同你既臣民諸侯已經失去從屬關係。
神聖羅馬帝國諸侯係特里布爾召開會議宣佈如果海因里希四世無法係一年內得到教宗既寬恕,佢地就唔承認海因里希四世既皇帝資格並就此邀請教宗黎奧格斯堡"欣賞"佢地選舉新皇帝。
額我略七世一句說話兵不血刃咁就消滅左海因里希四世既神聖羅馬帝國皇位。
海因里希四世即時帶住僅餘對佢效忠既士兵衝向羅馬。
“哇哇哇打到黎啦!!神聖羅馬帝國皇帝又想廢立教宗啦!!"
前住神聖羅馬帝國途中既額我略七世收到海因里希四世出兵既消息立刻匿入托斯卡納既卡諾莎城堡入面。
1077年1月25日海因里希四世同佢既軍隊追到上去將卡諾莎城堡重重包圍。
驚人既事件就咁發生啦。

以往教宗只係神聖羅馬帝國皇帝黃袍加身既工具只要聽話就得,但今次比你係到殺左個教宗比你返到去神聖羅馬帝國你就攞得返你個國家啦咩?
而家救得到你既人得返一個,佢就係城堡入面。
海因里希四世除低佢件皇帝袍換上套爛衫一個人走到卡諾莎城堡大門前跪係冰天雪地上面祈求教宗既寬恕。
經過三日三夜大門終於打開…

得到左教宗既寬恕海因里希四世即刻帶住隊兵調頭返神聖羅馬帝國。
但到佢返到去時神聖羅馬帝國諸侯已經準備左個新皇帝士瓦本公爵萊因費爾登的魯道夫去迎接佢。
經過三年既戰爭海因里希四世戰勝並處死萊因費爾登的魯道夫。
之後海因里希四世嫁個女阿格尼絲公主比腓特烈·馮·霍亨斯陶芬令佢可以繼承本來係魯道夫既士瓦本公爵。
眼見情勢有變,額我略七世再次對海因里希四世施以絕罰。
不過今次唔同啦,海因里希背脊冇人。
海因里希四世帶兵攻入羅馬城立教宗克萊孟三世,額我略七世逃亡南義大利並請求南義大利諾曼人出兵為佢復國。

南義大利諾曼人成功趕走海因里希四世,但額我略七世亦係流亡中途過生。
海因里希四世返到神聖羅馬帝國又有人招呼佢啦,今次係佢個大仔義大利的康拉德二世,只此開始左長達三十年名為大薩克森暴動既內戰。
到1101年海因里希四世終於戰勝佢個仔義大利的康拉德二世但之後時任教宗帕斯卡二世又慫恿佢另一個仔做反,今次終於成功。
1105年眾叛親離既海因里希四世係家族同諸侯內戰中逝世,臨死前發表聲明承認皇帝係冇權廢立教宗。
然後佢個反骨仔登基成為神聖羅馬帝國皇帝海因里希五世,但當初慫恿佢做反既教宗帕斯卡二世拒絕為佢加冕反而指摘佢擅自任免主教。
海因里希五世又出兵羅馬結果又換黎絕罰同十幾年既內戰。
最後1122年9月23日神聖羅馬帝國皇帝海因里希五世同時任教宗嘉禮二世簽訂沃爾姆斯宗教協定。
大家一人讓一步,教士唔再為君主管理世俗事務君主自己管理自己國家而教宗就自由任免佢自己既主教從此各不相干。

1125年冇仔送終既海因里希五世過身薩利安朝結束。
1138年士瓦本公爵康拉德三世當選皇帝是為霍亨斯陶芬朝。
1152年佢個侄腓特烈一世繼位。
因敘任權鬥爭為神聖羅馬帝國帶黎半世紀既內戰到腓特烈一世即位時神聖羅馬帝國作為一個國家已經名存實亡。
為重建管治腓特烈一世頒布采邑法令下令所有接受采邑者為皇帝服兵役,然後再將最強大既諸侯巴伐利亞公國分割出奧地利公國出黎。
搞掂左德意志地區之後就要搞埋義大利然後出兵羅馬廢立教宗。
但當腓特烈一世帶兵操入義大利時發現當地既諸侯早就成為晒教廷既附庸,佢地成立倫巴底同盟係萊尼亞諾戰役重挫腓特烈一世。
自此神聖羅馬帝國既勢力退出義大利,教廷既獨立亦得以保障,亦為義大利城邦既發展同文藝復興埋下種子。
而玩唔成廢立教宗既腓特烈一世就改為搵另一樣野玩。

下集十字軍東征