Polymer 讀者都睇得明既簡易西史入門第一集:從唔神聖既羅馬帝國到神聖既羅馬帝國

係公元前七世紀亞平靈半島中部有對狗娘養既兄弟羅慕路斯同雷穆斯,佢地係台伯河邊七座山既中間建立起佢地既城市。然後羅慕路斯為左呢座城命名權殺左雷穆斯,從此呢座城就以佢命名為羅馬。羅馬經歷六個國王後到第七個國王因為佢個仔強姦民女惹起民憤。好衰唔衰呢個時候羅馬城比外族入侵,羅馬城居民唔願為國王而戰個個攞起武器離開羅馬城。羅馬國王只好向人民妥協成立元老院保護人民權利。

經過 SPQR( 元老院同羅馬人民 ) 七百年既奮戰,南滅迦太基東滅希臘,當年台伯河邊小小一座羅馬城變成西方最強大既國家將整個地中海變成佢地後院既小池塘。但到公元前 40 年又先後出現兩個軍事強人凱撒同屋大維,佢地靠軍隊既支持架空元老院成為羅馬帝國既皇帝。不過雖然呢個時候既羅馬帝國名義上係個人獨裁,但元老院仍有相當既權力。羅馬皇帝為加強個人獨裁就愈黎愈依賴軍隊既支持。結果到公元三世紀羅馬軍隊反客為主分裂成多個派系不斷廢立皇帝。最後班軍佬索性自立為帝,羅馬城成為各個軍頭爭奪皇位既殺戮戰場。

到公元三世紀未一個軍頭戴克里先奪得皇位。佢為穩定局勢發明四帝共治制將國家分成兩份,每邊各有正副皇帝。只要其中一個皇帝死左就由另外三個選個新皇帝出黎。結果當四個皇帝一上任就即刻全部反面,羅馬帝國分裂成東西兩個。

然後唔洗幾年一群前所未見既野蠻人出現係呢兩個帝國眼前。佢地係匈奴人。在此之前羅馬人眼中既蠻族不過係住係深山密林中既高盧或日耳曼人,除左文明程度低D之外基本上係人畜無害。

但呢班匈奴人從不知原於何處既遙遠東方一路燒搶殺到黎西方既盡頭。所過之處赤地千里尤如騎係馬上既人形蝗蟲。佢地首先搶掠係高加索山區既阿蘭人,阿蘭人頂唔順就跟住佢地一齊西進。跟住佢地又搶掠係東歐既哥德人,哥德人又頂唔順就跟住佢地一齊西進。之後佢地就搶掠東羅馬帝國,但就連東羅馬帝國都頂順就係匈牙利到畫左達地比佢地住。住落黎做咩?唔通要我耕田?我蝗蟲黎架嘛!要食就緊係搶架啦!

然後匈奴人繼續西進,將沿途既“野蠻人”(同匈奴人比佢地算係紳士)推向西羅馬帝國既邊境。一 D 加入匈奴人既搶掠大軍,另一 D就內附羅馬帝國成為佢地既僱傭兵。最後匈奴人一路搶到羅馬城外,全歐洲既蠻族都跟隨匈奴人既腳步將西羅馬帝國變成佢地既提款機。一 D 入黎搶掠,一 D 入黎做僱傭兵,反正實際上都係同一樣野。直到 475 年西羅馬皇帝尼波斯被日耳曼僱傭兵歐瑞斯特趕走,歐瑞斯特立自己個仔羅慕路斯·奧古斯都為西羅馬皇帝。十個月後佢又被另一個日耳曼僱傭兵奧多亞塞趕走,不過今次奧多亞塞冇自立為帝。佢叫自己做義大利國王。476 年 9 月 4 日西羅馬帝國滅亡。

廢墟比人搶掠幾都次都係廢墟。冇左羅馬皇帝既羅馬城由羅馬主教成為殘存羅馬人民既保護者,係蠻族反覆搶掠下祈求下一個救世者。

係歐洲大陸北面比利時高盧省,佢地既總督係薩利昂法蘭克人既希爾德里克一世仍然繼續效忠於早已唔存在既西羅馬帝國。481 年希爾德里克一世死後佢個仔克洛維一世自封法蘭克國王建立墨洛溫朝。克洛維一世在位時放棄日耳曼人信奉既亞流教派皈依羅馬天主教並將西哥德人趕入比利牛斯山對面征服整個現代法國成為最強大既蠻族國家。

西哥德比人趕入比利牛斯山後又過左百幾年後又有新一批蠻族進入歐洲。雖然呢批人明顯比當時既歐洲人文明得多,之所以佢地會比班蠻族稱為蠻族係因為佢地唔信天主教。佢地係新興宗教伊斯蘭教徙。阿拉伯帝國倭馬亞朝既穆斯林游過直布羅陀海峽消滅西哥德王國,而家要爬過比利牛斯山直入西歐天主教世界。當時既法蘭克國王提奧德里克四世派佢既宮相鐵鎚查理係圖爾戰役擊敗穆斯林。六年後 737 年提奧德里克四世過身大權在扼既鐵鎚查理七年拒立新王成為法蘭克王國既實權者者。要到 743年鐵鎚查理死後佢個仔矮子丕平先立提奧德里克四世個仔希爾德里克三世為王。

有日矮子丕平去羅馬拜神佢就同教宗匝加利亞呻啦”哎呀我個國王咩都唔做我點算好呢?教宗就答佢“邊個管理法蘭克王國邊個就係法蘭克國王”得到左教宗默許 751 年丕平廢黜希爾德里克三世自立為法蘭克國王建立卡洛林朝而且仲得到教宗親自到巴黎為佢加冕。

矮子丕平成為法蘭克國王丕平三世之後羅馬城又出事啦。754 年倫巴底人入侵羅馬城,雖然呢 D 對佢地黎講已經係日常生活,不過有 D 唔係好日常既事發生左,今次竟然有人幫拖。得知教廷受襲丕平三世即刻帶兵南下趕走倫巴底人呢班山番,而且仲將倫巴底人手上搶返黎既土地送比教宗。咁問題又黎啦請問究竟係冊封封建領主既教宗大啊?定教宗不過係封建領主分封既諸侯呢?心虛既教廷就即刻老作左份文件「君士坦丁獻土」話我既土地係當年君士坦丁大帝遷都君士坦丁堡後送比我既!

唔吹由自可一吹吹大佢,教廷由此仲得出結論:所以我就係西羅馬帝國既繼承人!

768 年 10 月 9 日丕平三世死後由佢個仔查理繼位。查理繼位後法蘭克王國繼續擴張仲征服埋今日既德國同義大利。到而家為止歐洲既大部分蠻族都係一個國王既管理之下,就好似當年既羅馬帝國一樣…

799 年教皇利奧三世被當地貴族趕出羅馬,查理出兵鎮壓暴動後將利奧三世接回羅馬城。800年既聖誕法蘭克國王查理係羅馬教廷既聖彼得大教堂跪係教宗利奧三世面前做禮拜。禮拜完成後企返起身突然頭頂多左個皇冠然後全場歡呼:上帝為查理皇帝加冕 !! 為世界帶黎和平既羅馬皇帝!就咁法蘭克國王查理就變成羅馬帝國皇帝查理曼大帝。

“羅馬帝國邊有冧過呢 ? 不過係遇到少少既麻煩而已。”至少當時既歐洲人都係真心咁諗。814 年 1 月 28 日查理曼大帝駕崩由佢個仔虔誠路易繼位。虔誠者路易繼位後根據日耳曼民族傳統將身家平分比佢三個仔。大仔洛泰爾得到意大利。二仔丕平一世得到阿基坦。細仔日耳曼人路易得到巴伐利亞。好衰唔衰到 823 年佢又同二奶生多個仔禿頭查理,而家副身家又要重新分過啦。多隻香爐多隻鬼三個啊哥又即刻反佢老豆檯。虔誠路易唔夠三個仔打只好讓位,結果兩個細仔調轉槍頭打大仔洛泰爾。洛泰爾又唔夠打,丕平一世同日耳曼人路易又拖返老豆虔誠路易出黎做皇帝。呢場人頭落地既家族爭產大戲到 840年 6 月 20 日虔誠路易死後終於結束。早係 838年二仔丕平一世已經病死所以而家就由洛泰爾,日耳曼人路易,禿頭查理三人分身家。843 年 8月三兄弟簽訂凡爾登條約將法蘭克王國分三份:

• 一份洛泰爾一世既中法蘭克王國
• 一份禿頭查理既西法蘭克王國
• 一份日耳曼人路易既東法蘭克王國

洛泰爾同佢 D 仔都死埋後東西法蘭克王國係墨爾森條約分埋中法蘭克王國。

東法蘭克王國國王日耳曼人路易死後由佢個仔胖子查理繼位。西法蘭克王國國王禿頭查理死後由佢個仔口吃路易繼位。口吃路易死後由佢兩個仔路易三世同卡洛曼二世繼位。路易三世同卡洛曼二世死後王位又返返去胖子查理到。但胖子查理又比佢個侄克恩滕公爵阿努爾夫廢左。阿努爾夫得到東法蘭克王國。巴黎伯爵卡佩家族既厄德一世得到西法蘭克王國。之後阿努爾夫又早死得個幾歲既仔孩童路易。孩童路易係 911 年十八歲時死埋。東法蘭克王國貴族選法蘭克尼亞公爵康拉德一世做東法蘭克王國國王,東法蘭克王國卡洛林朝結束。康拉德一世又傳位比薩克森公爵捕鳥者亨利建立薩克森朝。936 年捕鳥者亨利個仔奧圖一世繼位。到當時教皇國依然不斷受到倫巴底王國既入侵。時任教宗若望十二世就向奧圖一世承諾如果你搞得掂倫巴底人既我就封你做羅馬帝國皇帝。962 年踩住倫巴底人既屍骸進入羅馬城既奧圖一世受封羅馬帝國皇帝。不過今次同前面查理曼大帝個 D 有 D 唔同,佢呢個叫神聖羅馬帝國皇帝,全稱為德意志民族神聖羅馬帝國皇帝。作為交換奧圖一世又頒布 < 奧托特權 > 確認教皇國係教宗私產,係教皇國內教宗有絕對既權力同時教宗又要忠於神聖羅馬帝國皇帝。從此法蘭克王國永遠分家走上各自既道路成為今日法國同德國既雛型。而佢地既祖先矮子丕平留落黎既問題卻會繼續纏繞佢地。

下集: 敘任權鬥爭