發牌風波,越燒越烈,從政總集會,到特權法遭否決,怒火漸漸由政府燒至無綫這個電視霸權之上。無綫製作《東張西望》特輯,兩個黑衣主持對港視盡情抹黑,為政府辯護,一石激起千重浪。網民蘊釀在台慶發動罷看,藝人陳百祥公然挑戰,開賭說收視跌至兩三點就跪回家。

這時候,一個念頭在寂寂無聞的膠登討論區發起,那個人發帖之時,或者沒有想到,這個念頭在一星期後發展成如火如荼的網絡運動,最後更令無綫台慶收視跌至近年新低。

《膠登時報 -Polymer》獨家訪問《緊急動員網絡力量 – 尋找 800 個收視盒,要陳百祥下跪》臉書專頁發起人:香港獨立

駱:駱賓王爾德
香:香港獨立

駱:首先想問當初點解會諗到尋找 800 個收視戶叫佢地熄機呢個 idea ?你個陣時對收視調查所知既又有幾多?
香:其實最初只係諗住透過網絡動員,動員香港人熄機,無諗過要搵 800 個收視調查戶的,完全不知道什麼是收視調查戶,接著有報章報導,收視率,是透過安裝在 800 個家庭的收視紀錄儀所收集的數據,推算全港收率,接著便主力尋找該 800 家庭,呼籲他們熄機,務求把收視率推低。

駱:呢個 Page 係一個禮拜之內有二萬幾人讚好,係唔係出乎你意料之外?你最初預計有幾多人響應呢個運動?你覺得點解會有咁多人 like 呢個 page ?背後原因係咪因為對 TVB 不滿?
香:絕對是出乎意料之外,最初估計只會有 200.–.300響應號召,估不到一星期有二萬幾人響應,近幾年,好多人不滿 TVB 作為一個一台獨大的電視台,製作千篇一律既節目,加上近日阿叻挑釁的言論,導致這麼多人參與這次熄機行動。

駱:最後我地尋找到 20 個收視盒,無線台慶騷平均收視得 29 點,創十多年既新低,但係阿叻始終係唔使跪,仲可以死撐串柒柒。對於呢個結果,你滿唔滿意?
香:熄機行動唔係針對阿叻,係要表達對 TVB 節目質素的不滿,雖然台慶夜當晚,無線的平均收視得 29 點,創十年新低,但由於所尋找到的收視盒距離 800 個,還有很大距離,嚴格來說,行動是失敗的。

駱:係呢一個星期搵收視盒既過程中,你覺得運動有冇咩做得不足既地方?
香:不足既地方,只係在 Facebook 動員,未有考慮有部份人係唔會用 Facebook 或唔會上網。

駱:我記得呢個運動去到中段開始上哂報紙,有好多傳媒想約你做訪問,點解你當初拒絕?
香:由於我既網名特殊,唔想因接受訪問,而把整個熄機行動.sidetrack 左。

駱:有膠登巴打曾經投訴過點解個 Page 無乜點提膠登個名做宣傳,你可唔可以講下點解?
香:我希望整個行動以香港人為主體,要話俾每一個香港人知道,行動你係有份既,而且需要每一個香港人去參與,如果刻意宣傳膠登,會有人覺得,這是膠登既事,唔關我事。

駱:呢個 Page 未來仲會有咩動向?
香:已有構思下一步行動,詳情請留意 Facebook 專頁。

駱:你覺得呢次既運動,一百分滿分,你會比幾多分?
香:我諗我唔會評分去睇這次運動,最重要係參與運動既人對結果是否滿意
如果覺得滿意既,行動就可能到此結束
如果覺得唔滿意既,要思考一下,是否有更多的東西可以做。

後記

阿叻跪不成,台慶夜還是慣性地得到了 29 點,CCTVB 說她對收視「很滿意」,或者有人會說,我們失敗了,他們成功了,然而,我們失敗了,沒有任何損失,他們成功地跌了三百萬,創造了收視記錄 — 十年來新低,還要不顧大台儀態,封殺壹傳媒,誰勝誰負,此刻還重要嗎?如香港獨立所說,我們還會有進一步的行動。